Pak më parë gjatë ditës, shkrimtarja e njohur Flutura Açka adresoi një problematikë shqetësuese sipas saj, për veshjen apo zhveshjen e moderatoreve shqiptare, duke marrë për shembull pikërisht ato të sportit.
Në një postim në Facebook, ajo shprehej se nuk e di nëse kjo zhveshje është zgjedhje e tyre apo e shefave të tyre, por e di që këtyre vajzave u duhet të mbijetojnë në këto ekrane të egra në këto forma, ndryshe do ta pësojnë si ca mikeshat e saj “që nuk duken më andejpari ekraneve se janë ‘plakur’”.
Gjithashtu, Açka theksoi faktin se vajzat që kanë dalë me të tilla veshje janë më të pafajshmet, ndaj i kërkon edhe ndjesë.
Nuk e dimë se cilës mikeshë iu referua shkrimtarja e njohur dhe nëse kishte një rast specifik në mendje kur shkroi këtë status, ndaj ne të iconstyle.al e telefonuam për ta pyetur konkretisht për deklaratën.
Por Flutura Açka zgjodhi që të shmangej duke e përgjithësuar fenomenin pa dashur të japë emra konkretë:
“Ndonjëherë, jo në të gjitha rastet, më duket e tepruar pjesa e veshjes dhe mendoj që veçanërisht moderatoret, duhet të jenë pararoja e asaj që unë e quaj brenda etikes. Duhet një lloj marrëveshjeje në thonjëza e heshtur mes moderatoreve që ato të paktën të mund të imitojnë atë që është më e mira, sidomos në shoqërinë shqiptare si e jona me ca doza barbarie. E kam në përgjithësi për moderatoret nuk e kam vetëm për moderatoret e sportit, sportin e kam përdorur si një simbol për të thënë se ‘sporti’ i burrave shqiptarë është përdhunimi”, u shpreh ajo!
Madje shkrimtarja solli në vëmendje edhe një rast që sipas saj i kishte bërë përshtypje në një emision ku, një operator fokusonte gjoksin e moderatores në mënyrë të vazhdueshme. Ajo i quajti gjëra djallëzore këto veprime dhe theksoi se ne vajzat duhet të bëjmë diçka që mund ta shmangim!
E pyetur se cilit rast iu referua, cilit televizion apo moderatore, Flutura nuk përmendi emër, duke mos e adresuar siç duhej problematikën e trajtimit të femrave si një objekt seksual.
“I kishte dalë pak gjoksi, dhe kjo mund duk shumë djallëzore dhe e pistë nga e regjisë dhe operatorëve që sigurisht janë burra. Ne femrat të mos jemi të parat që ata të na shikojnë si objekte seksi, ne jemi vajza, gra me ide, mendje, me trup me staturë me idetë e programet tona e ato janë gjërat më të rëndësishme. Trupi ynë është personal, për veten tonë, burrat apo të dashurit tanë, por jo si objekt për lakmi për burrat kushdo qofshin ata përtej ekranit”, u shpreh ajo.
Në këtë mënyrë, shkrimtarja e njohur zgjodhi të fliste në përgjithësi për fenomenin, në një kohë që do të ishte më mirë të fliste me emra konkretë.
I gjithë ky përgjithësim i “zhveshjes së moderatoreve” apo i trajtimit të tyre si një objekt seksual, e bën deklaratën e saj të duket thjesht si një pikë uji e hedhur në mesin e një oqeani fjalësh, komentesh, apo fotosh e videosh që shohim gjithandej për femrat në rrjetet sociale, pa ndonjë funksion për t’i ardhur në ndihmë vetë problematikës në Shqipëri!
/Iconstyle.al
