Përshëndetje! Jam 24 vjeç dhe prej shumë vitesh, vuaj nga migrena, por kam shumë dhimbje. Jam bërë shumë e varur nga medikamentet. Nëse nuk i kam me vete kudo që shkoj, sëmurem direkt. Ky shqetësim më ka filluar prej gjashtë vitesh. Jam shumë e ndjeshme dhe i përjetoj shumë keq gjërat. Edhe sikur një film të shoh, përjetoj shumë ankth. Pi pothuajse çdo ditë ilaçe dhe më është kthyer në një frikë të madhe. Nuk di si të veproj që të mos jem kaq e varur.
Përshëndetje e dashur lexuese!
Faleminderit që e ndave shqetësimin tënd me mua dhe lexuesit e revistës. Meqë ke vite që vuan prej migrenës, besoj se je e informuar për këtë sëmundje dhe mënyrën sesi ajo mund të trajtohet. Për të gjithë lexuesit, është e nevojshme të shpjegojmë shkurtimisht çfarë është migrena.
Migrena është një formë e dhimbjes së kokës, e cila mund të bëhet tepër e fortë dhe shoqërohet me simptoma të tjera si të përziera dhe dobësi trupore. Dikush që vuan nga migrena mund të jetë tejet i ndjeshëm ndaj dritës dhe zhurmave. Migrena mund të prekë këdo, më së shumti gratë, njerëzit që kanë një histori familjare migrene dhe ata me shqetësime të tjera shëndetësore.
Për të përcaktuar një mjekim të përshtatshëm, duhen kryer ekzaminime të rregullta tek mjeku. Mjekimet janë trajtimi numër një për migrenën dhe ato duhen marrë në mënyrë të rregullt. Për migrenën, nuk ekziston një kurë, por trajtimi i saj përqendrohet te lehtësimi i simptomave dhe parandalimi i tyre. Trajtimi i saj bëhet përmes medikamenteve të ndryshme, të cilat përshkruhen nga mjeku. Mjekimi duhet marrë në kohë, që të jetë më efektiv. Po ashtu, ka gjëra të tjera që mund të praktikohen, për të lehtësuar dhimbjen, si: çlodhja e syve në një dhomë të qetë dhe të errët, vendosja e një rrobe të ftohtë ose pakoje me akull në ballë dhe konsumimi i lëngjeve.
Kërkuesit besojnë se migrena ka shkaqe gjenetike, por ka edhe faktorë të tjerë që e nxisin migrenën, si: stresi, ankthi, ndryshimet hormonale, mjekimet, ndryshimet e papritura në klimë, duhani, kafeina, alkooli, ushqime të caktuara etj.
Migrena dhe dhimbjet e kokës janë parë gjithmonë si një çështje mjekësore, por nuk duhen parë vetëm në këtë mënyrë. Edhe pse kërkimet për migrenën janë zgjeruar, sërish, nuk ka një shpjegim të qartë mbi shkaqet dhe trajtimin e saj. Përveç mjekimeve, ka të dhëna se psikoterapia i ndihmon njerëzit me migrenë. Psikoterapia mund të luajë një rol të rëndësishëm në reduktimin e shpeshtësisë dhe ashpërsisë së migrenës. Kjo pasi, pavarësisht faktit se migrena është e lidhur me shkaqe gjenetike, ajo nxitet nga faktorë mjedisorë, të renditur më lart (stresi, mjedisi dhe mënyra sesi ne përballemi emocionalisht me situatat).
Te pacientët me migrenë, ka edhe çështje psikologjike “të fshehura”. Pjesa psikologjike te migrena lidhet me faktorët psikologjikë që e nxisin dhimbjen. Përmes psikoterapisë, dikush që vuan nga migrena ndihmohet: së pari, të identifikojë nxitësit (cilët janë ata faktorë mjedisorë që e nxisin dhimbjen e kokës); së dyti, të eliminohen nxitësit (terapisti lehtëson dhe monitoron ndryshimet në mjedisin e klientit); së treti, reduktimi i stresit (terapia ndihmon në përmirësimin e përballimit të stresit); së katërti, menaxhimi i zemërimit (zemërimi i akumuluar shpie në shpeshtim të migrenës); së pesti, teknika relaksimi (terapisti e ndihmon klientin të mësojë të relaksohet, p.sh., përmes meditimit) etj.
Për të lehtësuar simptomat e migrenës, duhet të bëhen edhe disa ndryshime në stilin e jetesës (pa ndihmën e një terapisti):
Së pari, duhen praktikuar strategji për menaxhimin e stresit: ushtrime, teknika relaksimi etj. Këto ndihmojnë në përmirësimin e funksioneve fiziologjike, si: rrahjet e zemrës, qarkullimi i gjakut dhe tensioni i muskujve.
Së dyti, duhen përcaktuar situatat që e nxisin migrenën. P.sh., nëse tregohesh e vëmendshme, mund të shohësh se vende, ushqime apo situata të caktuara e nxisin dhimbjen. Mund të të ndihmojë shmangia e këtyre vendeve apo situatave dhe rregullimi i rutinës së gjumit dhe ushqimit.
Si përfundim, duke respektuar këshillat e mjekut dhe duke parë mundësinë e një psikoterapie, dhimbja jote do të pakësohet dhe cilësia e jetës do të përmirësohet. Ndaj, kombinimi i të dyja trajtimeve do të ishte më efektiv.
