Reperi i njohur, Stresi pak ditë më parë iu rikthye sherreve virtuale në Tik Tok ku përdori një fjalor banal e aspak të hijshëm ndaj ‘kundërshtarëve’ të tij.
Ai madje i paralajmëroi ata publikisht se nuk ndalojnë me sharjet nga familja, do të veprojë ndryshe. E megjithatë çdo gjë i është kthyer si ‘boomerang’, pasi ka qenë i pari i cili ka kërkuar falje publike për fyerjet në rrjete sociale, duke u shprehur se në një moment e ka ‘humbur kontrollin’.
Në një shkrim të gjatë në Instastory, ai i kërkon falje familjes së tij për mënyrën sesi është shprehur në rrjete sociale, me fjalorin banal, gjë për të cilin duket se ata i kanë tërhequr disa herë vëmendjen.
“Jeta është tamam si një labirint, asnjëherë nuk e dimë se çfarë sfide apo pengese tjetër vjen më pas. Unë mendoj që kemi dy opsione: të marrin kontrollin pasi kemi dalë jashtë tij dhe e dyta i bie të mbijetosh nën presion. Kërkoj falje, nuk jam unë ai por koha tregon më së miri. I kërkoj falje familjes sime që janë bërë pjesë e internetit tashmë dhe pjesë e sharjeve. Unë i kërkoj falje publikisht të gjithë atyre që i kam ofenduar familjen por kam qënë jashtë kontrollit sepse u bë një vit e gjysmë, mos më shumë, që vetëm ofendohen familjarët tanë nga njerëz që si duket i kanë bërë mirë llogaritë me veten e tyre dhe kur i dëgjoj këto gjëra, normalisht janë shpifje por çdo gjë ka një limit. Unë do e respektoj këtë gjë bindshëm, lërini familjet, shihemi personalisht një ditë. Edhe njëherë, ju kërkoj falje, për të tjerat, i di Zoti i madh“, shkruan këngëtari në profilin e tij në Instastory.
Kjo nuk është hera e parë që Stresi kërkon falje publike për fyerjet në rrjete sociale, por a do të mund të reflektojë ai pas këtij mesazhi që dha?
