Çdo javë në rubrikën “Pyet Psikologen” do të postohet një letër e dërguar nga lexuesit e iconstyle.al. Nëse keni ndonjë shqetësim në jetën personale, familjare apo profesionale, na shkruani dhe psikologia e redaksisë sonë do t’iu përgjigjet, duke respektuar të gjitha të drejtat tuaja të privatësisë.
Përshëndetje! Shqetësimi im është për djalin 14-muajsh. Kam frikë kur luan me fëmijët e tjerë, pavarësisht se janë më të vegjël apo më të mëdhenj se ai. Sapo i afrohet një fëmijë tjetër për të luajtur me të ai e shtyn. Në rastet kur një tjetër fëmijë bërtet ose qesh, ai qan me të madhe. Më trembin këto gjëra, pasi nuk po ambientohet fare. Edhe me të rriturit që nuk i njeh është indiferent, por jo siç bën me fëmijët. Nuk e kam çuar në çerdhe, por e mbaj vetë në shtëpi. Dalim bashkë dy herë në ditë, në park ose në lokale, pasi nuk e kam mësuar mbyllur, por kam dalë që kur ishte 5-muajsh.
Përshëndetje e dashur nënë!
Faleminderit që më shkrove. Nga letra kuptoj që ka dy gjëra shqetësuese: e para, frika në prani të fëmijëve të tjerë dhe e dyta, shmangia e të rriturve ose indiferenca ndaj tyre. Natyrisht, unë kam nevojë të di më shumë gjëra rreth fëmijës suaj, që nga lindja deri më sot, duke përfshirë informacione të detajuara sidomos mbi marrëdhënien tuaj aktuale dhe dinamikat familjare.
Thua që e ke mësuar të dalë që kur ishte 5 muaj dhe se dilni dy herë në ditë. Çfarë bëni kur jeni së bashku? A e përdorni kohën së bashku për të komunikuar me njëri-tjetrin e për t’i folur rreth gjërave që sheh, njerëzve të rinj që takon… Apo koha e kaluar së bashku nuk përdoret për komunikim dhe në favor të zhvillimit të fëmijës?
Vështirësitë emocionale të fëmijës krijohen në sajë të dinamikave që ai përjeton gjatë rritjes, ndaj më lind natyrshëm pyetja: Si është atmosfera familjare? A i dëgjoni nevojat e djalit? A përgjigjeni në mënyrat e duhura ndaj tyre? Si është marrëdhënia juaj? Marrëdhënia me babanë e fëmijës? Me persona të tjerë të rëndësishëm? Këto janë disa gjëra thelbësore të cilat duhet t’i rishikoni kur vjen puna te kuptimi i arsyeve pse fëmija ka frikë dhe nervozohet para fëmijëve të tjerë.
Në fund, por jo më pak e rëndësishme është të dini se fëmijët në këtë moshë nuk kanë vetëm probleme emocionale. Mund të kenë dhe vështirësi ose probleme në zhvillim. Për të të ardhur në ndihmë, me aq sa po me shpreh në letër, të sugjeroj të shohësh për sjellje të tjera te fëmija:
A ka gjëra të tjera që ju shqetësojnë tek ai? Për shembull, a e kthen kokën kur ju i flisni në emër? A ndjek me sy një objekt ose lodër që i tërheq vëmendjen? A luan me lodra duke i futur në gojë? A e kalon një lodër nga njëra dorë në tjetrën? A zgjatet drejt teje (a zgjat duart) kur ia zgjat ti e para apo priret të shmanget? Si e ka kontaktin me sy?
A belbëzon? A prodhon tinguj të ndryshëm, qoftë dhe pa kuptim? A qesh me ju kur e bëni për të qeshur? A shpreh një shumëllojshmëri emocionesh? Këto janë vetëm disa nga gjërat që ju duhet të vrojtoni me kujdes. Nëse iu përgjigjeni me “jo” këtyre pyetjeve, atëherë ju duhet një konsultë e specializuar për fëmijën tuaj.
Gjithë të mirat,
*Lediona Braho, psikologe klinike
Për Iconstyle.al
