Duke filluar nga dita e nesërme, do të kemi mundësinë që kafenë ta pimë brenda ambientit të lokalit, por para se ta bëjmë këtë, duhet të kemi parasysh një gjë, barrën e madhe që po bie mbi biznesin!
Sipas vendimit më të fundit të qeverisë, nga 1 tetori do të hapen ambientet e brendshme të bareve, lokaleve dhe restoranteve, gjithnjë duke respektuar distancën.
Sot ministrja e Shëndetësisë, Ogerta Manastirliu, theksoi 3 rregullat bazë që duhen respektuar por që në fakt bien mbi kurrizin e pronarëve të lokaleve, që kanë qenë të penalizuar prej muajsh të tërë dhe kanë qenë në krizë që prej hapjes më 18 maj.
Qiranë paguaje të plotë, por hapësirën mos e shfrytëzo të gjithën!
Ministrja manastirliu thekson mbajtjen e maskës vetëm nga ana e personelit dhe ruajtjen e distancës 2 metra nga tavolina në tavolinë. Por kjo për Enri Jahajn, kryetar i Shoqatës së Bareve dhe Restoranteve, është disi jashtë logjike, duke qenë se pronarët e këtyre bizneseve kanë paguar prej muajsh qiranë e plotë, vetëm për të shfrytëzuar gjysmën e hapësirës.
Imagjino të marrësh një shtëpi me qira dhe të mos i përdorësh tualetin, ose dhomën e gjumit! A bën sens‼️
Në një prononcim për “iconstyle.al” Jahaj theksoi se nëse shfrytëzon vetëm gjysmën e hapësirës së një ambienti të brendshëm të një lokali, i bie që të paguash vetëm atë gjysmë, por kjo nuk ka ndodhur pasi deri më sot qiratë nuk janë reduktuar dhe as tarifa e plotë e hapësirës publike që i paguhet bashkisë që nga fundi i korrikut.
“Ne qiratë tona i paguajmë me m² dhe paguajmë si brenda dhe jashtë gjithashtu dhe për zënien e hapësirave publike që nga fundi i korrikut paguajmë dhe tarifën e plote në bashki. Tani me logjikë të thjeshtë, nëse shfrytëzon gjysmën ose me pak të hapësirës dhe aspak ambientet e brendshme, deri sot i bie dhe qiratë dhe taksat për hapësirë të reduktohen gjë që nuk ka ndodhur”.
Pjesa më e madhe e restoranteve në vend të cilat kanë marrë ambientin me qira, po hasin mjaft probleme në sigurimin e të ardhurave mjaftueshëm sa për të paguar qiranë, punonjësit apo të bëjnë furnizimin (lexo këtu). Shteti nuk ka bërë asnjë hap, për reduktimin e TVSH-së, shtyrjen e taksave, dhënien e kredive të buta, apo minimumi mbulimin e një pjesë të këtyre qirave.
Maska dhe përgjegjësi vetëm mbi personelin!
Një tjetër problematikë është përgjegjësia që bie mbi personelin dhe jo klientin. Sipas protokollit, personeli duhet të jetë i pajisur me maskë dhe duhet të sigurojë distancën, por kjo nuk varet vetëm në dorën e tyre. Jahaj shprehet për iconstyle.al se baret e restorantet po trajtohen si menca, ku vihet nga halli:
“Për hapësirat e brendshme përveç se theksi i është dhënë hapësirës 2 m nga tavolina në tavolinë në çdo drejtim dhe maskës nga stafi dhe të gjitha përgjegjësitë bien mbi personelin përgjegjës nuk ka asnjë rregull apo rresht ku klienti detyrohet. “Përveç kësaj po trajtohen restorantet dhe baret si menca, ku vihet nga halli dhe jo për te marrë një shërbim dhe për të larguar pak stresin”.
Një lokal lagjeje do punojë me 4-5 tavolina
Kështu sipas rregullores, një lokal lagjeje me 40-50 metra katrorë i bie të punojë me 4-5 tavolina dhe kjo nuk bën sens në kuptimin e fitimit, pasi hesapi nuk del as të mbash punëtorët në punë, as të paguash furnitorët dhe as të kesh fitim.
Pandemia dhe mungesa e mbështetjes nga qeveria ka detyruar rreth 20% të këtyre bizneseve që janë me qira të mbyllen, në pamundësi për të mbijetuar! Mënyra ka plot për të kontribuuar në këtë moment krize për të gjithë bizneset në vështirësi, që nga rimbursimi i pagave të punonjësve apo te paketat ndihmëse që do të ishin një stimulim i mirë në këtë periudhë.
Periudha e dimrit do të tregojë edhe më tepër vështirësitë që do të hasin këto biznese, kur nuk do të mund të futin në ambientet e brendshme të gjithë klientët por më pak se gjysma e tyre, aq sa nxënë tavolinat e vendosura me distancë 2 metra.
/Iconstyle.al
