Vetëm pak ditë më parë Arbana Osmani konfirmoi pjesëmarrjen e saj në “Festivalin e Këngës” në RTSH.
Por përveç moderatores dhe regjisorit, Festivali i këtij viti do të ketë edhe ndryshime të tjera.
Këtë e ka bërë të ditur vetë Arbana, në një bisedë me ndjekësit në Instagram sot, ku tregoi qasjen e re që Fest’61 do të ketë ndaj projekteve dhe artistëve. Sipas saj veçoria e këtij edicioni është se përtej çdo gjëje, qendra e organizimit do të jetë muzika dhe artistët alternativë e sidomos ata të rinj.
“Festivali meriton të ketë vëmendjen tek ajo për të cilën u krijua: Muzika e mirë, cilësore dhe origjinale. Për këtë arsye këtë vit e gjithë vëmendja do të jetë tek ajo: tek muzika, jo te performancat, jo tek klikimet dhe jo tek veshjet me xixa e balerinët me flakë, por tek muzika. Tek tingujt e orkestrës që është një nga vlerat më të mëdha që ka ky event. Tek talentet e rena dhe grupet alternative që në biznesin muzikor të klikimeve kanë kaq pak hapësira. Tek personalitetet e kulturës së këtij vendi, që ca na kanë braktisur e ca i kemi braktisur. Do jetë i bukur ky Festival”– ka shkruar Arbana.
Po ashtu, ndryshe nga vitet e fundit, këngët pjesëmarrëse do të prezantohen në netët finale të Festivalit pasi këtë edicion (siç e lexuat më lartë) klikimet nuk kanë rëndësi.
