Lajmi i ditës së djeshme për arrestimin e Loredanës nën akuzë për mashtrim dhe zhvatje ndaj një çifti zviceran, shkaktoi- pak të thuash- bujë në gjithë median shqiptare.
E ndërsa Loredana u lëshua për t’u hetuar në gjendje të lirë, sot u rikthye në vëmendje një tjetër denoncim i bërë karshi saj nga një ish- mikeshë (shiko këtu).
Leonard Bombaj
Në 2010-ën, Ajsi Xhaxhaj, asokohe 15 vjeçe, denoncoi regjisorin Leonard Bombaj se kishte abuzuar me të.
Sipas akuzave të Ajsit, abuzimi seksual kishte ndodhur gjatë kohës kur ajo ishte pjesë e “Sirea Film”, si edhe protagoniste e projektit televiziv “Kripmjaltëzat”.
Nga ana e tij, Bombaj u mbrojt duke deklaruar se asnjëra nga pretendimet e vajzës nuk ishin të vërteta dhe se gjithçka nga ana e saj kishte si motivacion kërkesën për vëmendje. Madje në 2011-ën, ai publikoi edhe një libër të titulluar “Në emër të atit, të birit dhe shpirtit të zbathur”, ku rrëfente për një vajzë 15-vjeçare me emrin Ambla, “gënjeshtare”, “kokëkrisur” e cila “trafikohej me dëshirë” dhe që sipas tij, është personifikimi i Ajsit.
Gjykata e shpalli të pafajshëm regjisorin, në mungesë të provave.
Çështja u rikthye në vëmendje në mars të 2017-ës, kur Ajsi Xhaxhaj foli publikisht për akuzat për abuzim seksual ndaj saj nga Bombaj, në një intervistë tek “Pasdite në Top Channel”.
“Bëhet fjalë për moshën nga 10 deri në 15 vjeçe”, u shpreh Ajsi, “Thanë që e bëra për famë, por përse duhet ta bëja për famë, kur unë isha idhull i bashkëmoshatarëve të mi? U tha që e bëri për lek. Teorikisht, unë duhet të kisha shumë para. Mua më vinte një fletë çdo muaj se sa para më hidheshin në llogari, por unë s’i pashë kurrë.”
Suela Kalaja
Në dhjetor të 2016-ës, këngëtari Saimir Çili dhe bashkëshortja, Suela Kalaja, paditën njëri- tjetrin për dhunë.
Sipas burimeve të “VIP Pages”, Kalaja i kishte qëlluar në shuplakë Çilit, teksa debatonin. Për këtë, këngëtari bëri një kërkesë për urdhër mbrojtjeje ndaj bashkëshortes.
Edhe pse më vonë marrëdhëniet mes tyre u rregulluan, Prokuroria e Tiranës vendosi të ngrejë një akuzë zyrtare për dhunë në familje ndaj Suela Kalasë. Por, edhe këngëtarja nga ana e saj bëri një denoncim në polici, duke dëshmuar se kishte qenë viktimë e dhunës në familje. Ndërkaq, vijuan edhe procedurat për divorc.
Saimir Çili dhe Suela Kalaja janë prindër të një vajze, Isea, e cila ishte konkurrente tek sezoni i fundit i “The Voice Kids”.
Pas kësaj, Suela Kalaja u shpall e pafajshme nga gjykata.
Në korrik të 2017-ës, përsëri “VIP Pages” publikoi lajmin se Suela Kalaja ishte martuar me biznesmenin Arjon Abdyli.
Në shkurt të 2019-ës, e ftuar tek emisioni “Ftesë në 5”, Suela Kalaja foli me tone çuditërisht të buta për marrëdhënien me ish- bashkëshortin.
“Për hir të vajzës do të jemi gjithmonë të dy, deri në fund. Sa mirë që Zoti më bëri psikologe dhe e kam superuar këtë pjesë.”
“Në fakt, situata me Saimirin nuk ishte në ato nivele. Por portalet shkruajtën dhe u bë e madhe.”
Stresi
Arrestimi i reperit Stresi në tetor, pushtoi internetin dhe televizionet.
31-vjeçari u ndalua në një hotel në Linzë, teksa në dhomën e tij u gjet një sasi e vogël kokaine, një armë zjarri pistoletë dhe 12 fishekë.
Arrestimi i Stresit erdhi pas hetimit disa- mujor të një organizate kriminale, pjesë e së cilës dyshohej të ishte edhe reperi.
Pas një procesi gjyqësor në Gjykatën e Tiranës, avokati i reperit vendosi të mos e çonte çështjen për ankimim në Gjykatën e Apelit, duke pranuar kështu dënimin arrest me burg për armëmbajtje pa leje.
Ai po vuan aktualisht dënimin në qeli.
Por, nuk qe e para herë që Stresi përfundonte në media për telashe serioze me policinë.
Edhe më parë, ai është arrestuar disa herë nën akuzë për disa vepra penale.
Në 2011-ën, Stresi u denoncua nga Leonard Bombaj se e kishte kërcënuar dhe dhunuar për të rikthyer në shkollën “Sirea” aktoren Ajsi Xhaxhaj. Më pas, Stresi u la i lirë me kusht ndërsa i konsideroi të pavërteta akuzat e regjisorit, duke deklaruar për “Panorama” se në fakt, vetë Bombaj i kishte ofruar para në këmbim të heshtjes, pasi Stresi dhe miqtë e tij e kishin dhunuar për shkak të abuzimit që regjisori, kishte kryer ndaj ish-nxënëses së tij Ajsi Xhaxhaj, mikeshë e reperit.
Këto, janë vetëm dy nga rastet më të përfolura të Stresit, pasi është ndaluar edhe herë të tjera për përfshirjen në sherre, lëvizje me makinë mbi shpejtësinë e lejuar, etj.
Liljana Kondakçi
Në 2011-ën, lajmi se këngëtarja e njohur Liljana Kondakçi ishte dënuar me 4 vite e 8 muaj burg në Itali për trafik droge, pushtoi median shqiptare.
Sipas medias, ajo ishte pjesë e një organizate kriminale që trafikonte lëndë narkotike nga Shqipëria drejt Italisë, madje kishte edhe një pseudonim interesant: “La Mamma”- mamaja.
Gjithashtu, u shkruajt se Kondakçi po vuante dënimin në një burg në Cosentino-s, në Cosenza, pasi u arrestua në Greqi.
Por në fakt, gjithçka nisi që në vitin 2006, Liljana Kondakçi u ndalua nga policia në Bari të Italisë, ku kthehej nga Greqia.
Në janar të 2013-ës, e ftuar në emisionin “Zonë e Lirë”, Kondakçi u shpreh se kishte parapëlqyer të mos jepte deklarata në median e shkruar, për shkak se donte që intervista e saj e parë publike pas përhapjes së lajmit, të bëhej në një emision live, ku do të ishte edhe më e besueshme për publikun.
“I respektoj mediat, nuk i gjykoj.”, u shpreh Liljana.
Ajo e konsideroi ndodhinë pasojë e një keqkuptimi, teksa shpjegoi se pas 20 ditësh, i thanë se çështja ishte mbyllur dhe ishte kthyer në Shqipëri.
“Meqë unë dhe familja ime nuk kemi patur kurrë probleme të kësaj natyre, nuk i njihja ligjet që ekzistojnë atje.”
“Mendoja se kjo punë kishte mbaruar. Në fakt, kishte mbetur pa u mbyllur dhe ky sqarim, u bë pa prezencën time, sepse u tha që kjo çështje u mbyll.”
“Pas 4 vitesh, sikur edhe një orë të të dënojnë ata, ti je e detyruar të shkosh. Sigurisht që shkova. Nuk më arrestoi njeri, siç thuhet këtu.”
“Shkova në Itali, e mbylla dhe u ktheva me shumë mall dhe me shumë qetësi që kjo punë u mbyll dhe jam shumë e lumtur që jam këtu pranë jush.”
Për dy vitet e saj në heqje lirie, Liljana Kondakçi u shpreh se i kishte kaluar mjaft mirë, falë mbështetjes se familjes dhe të fansave që i shkruanin.
“Italianët më respektonin edhe si personazh publik, edhe si person, duke më njohur nga afër.”, u shpreh Liljana, ndërsa pyetjes së Arjan Çanit se çfarë hante për mëngjes kur ishte në dënim, iu përgjigj:
“Atë që kam ngrënë gjithë jetën time dhe s’më ka munguar asnjëherë.”
