Moderatorja e njohur shqiptare Xhemi Shehu ka çuditur kolegun e saj Salsano Rapi por edhe të gjithë shikuesit, me deklaratën e saj se, kjo do të jetë hera e fundit që ne e shohim në televizion.
E ftuar në emisionin “Pasdite në Top Channel”, Xhemi ka treguar se nuk i ka pëlqyer asnjëherë fama dhe se sa herë që është shfaqur në sezonin e Portokallisë, ka menduar se ky do të jetë sezoni i saj i fundit.
“Është shumë e çuditshme që jam ende në televizion, sepse jam natyrë e rezervuar, nuk më pëlqen të jem në qendër të vëmendjes”, pohoi ajo e ftuar në “Pasdite në Top Channel”, bashkë me Salsano Rapin dhe Alban Dudushin.
Ajo kujtoi audicionin e parë që i hapi dyert e Top Channel. Në vitin 2003, Xhemi konkurroi për të qenë velinë e “Fiks Fare” dhe u zgjodh mes dhjetëra vajzave nga e gjithë Shqipëria. Që atëherë, ka qëndruar gjithmonë në Top Channel. Por përherë ka qenë në dilemë; para çdo sezoni mendonte se do të ishte hera e fundit në televizion, dhe kështu mendon edhe për sezonin e ri.
“Për çdo program që kam prezantuar, kam thënë ky do të jetë i fundit. Kështu them edhe për këtë sezon”.
Kjo deklaratë e habiti edhe kolegun Salsano Rapi, i cili shprehu çudinë duke thënë se ishte hera e parë që po e dëgjonte. Sipas tij, të punosh me Xhemin është shumë e thjeshtë, pasi është një njeri që nuk i ndërlikon gjërat.
