Ditën e djeshme ministrja e Shëndetësisë Ogerta Manastirliu ka kërkuar sot mbylljen e shkollave. Në një komunikim në rrjetet sociale, Manastirliu u shpreh se i ka propozuar Ministrisë së Arsimit që pas 1 dhjetorit të vendosë në zbatim skenarin e dytë.
Ky skenar parashikon që mësimi të alternohet, në klasë, siç është proceduar deri më tani, dhe në platformat online. Sipas saj, mësimi do të alternohet në varësi të situatës epidemisë në zonë.
Deri tani fëmijët nuk vlerësohen të jenë transmetues të lartë të infeksionit, rezulton se protokollet në shkolla janë zbatuar. Por për të minimizuar risqet ku të pranishme janë edhe infeksionet e tjera respiratore, kemi peshuar rëndësinë e shëndetit të fëmijëve dhe pas rekomandimit të Komiteti të Ekspertëve kemi vendosur që t’i rekomandojmë MASR që prej datë 1 dhjetor të aplikojmë skenarët me mësim të alternuar, pra në formën klasike, fizike dhe të kombinuar me mësim online. Bazuar në specifikat e sistemit arsimor dhe të situatës lokale të epidemisë.
Ndërkohë këtë të enjte, ministrja e Arsimit, Evis Kushi ka lajmëruar sot në një njoftim për shtyp se maturantët dhe klasat nga e para në të pestë do të duhet të shkojnë në ambientet e shkollës, pra do përjashtohen nga mësimi online.
Ndërsa klasat nga e 6 në të 9, si dhe klasat 10 dhe 11 do të zhvillojnë mësimin në këtë mënyrë: në javën tek, pra javën e parë dhe të tretë të muajit: 2 ditët e para të javës në mjediset e shkollës, dhe 3 ditët e tjera të javës online. Në rast se situata me COVID përkeqësohet mund të aplikohet skenari kur vetëm klasat fillore (nga 1 tek e 5) dhe maturantët zhvillojnë mësimin në klasë, ndërsa të tjerët online.
Është e kuptueshme se Ministria e Arsimit ka dështuar në sigurimin e zhvillimit të mësimit online, andaj po i çon maturantët në shkollë në mes të pandemisë, duke mos marrë asnjë masë tjetër.
Kliko KËTU për të lexuar vendimin e plotë.
Pasojat e vendimit të vonuar!
Së pari, nxënësve do ju duhet shumë kohë dhe punë për tu ambientuar me mësimin online. Nga krijimi i klasave online deri tek shpërndarja e leksioneve dhe përdorimi i platformës që do përdorin. Kujtojmë se gjatë semestrit të dytë të vitit 2019-2020 ka krijuar goxha mangësi pikërisht prej mungesës së njohurive. E njëjta gjë vlen edhe për stafin pedagogjik.
Nëse mësuesit do ishin trajnuar para nisjes së vitit shkollor dhe nxënësit do kishin nisur mësim në shtator në këto platforma, përveç infektimeve, do ishte shmangur edhe kaosi. Përshtatja me skenarin e ri do shkaktojë prapambetje dhe probleme të shumta.
Së dyti, nxënësit dhe mësuesit do shpenzojnë më shumë kohë dedikuar shkollës. Sepse do jenë edhe në ambientet e shkollës dhe më pas online. Vlen të theksohet se sistemi online kërkon goxha angazhim, dhe alternimi i tij me mësimin në klasa do shkaktojë shpërqëndrim dhe fragmentizim të nxënësve.
Së treti, ndonëse mësimi do alternohet, kjo nuk sjell ulje të rrezikut të infektimit. Kontakti i përditshëm i nxënësve dhe mësuesve qoftë edhe për një orë përbën rrezik potencial të transmetimit të virusit. Të gjithë jemi dëshmitarë se si masat anti-Covid nuk respektohen duke përmendur këtu grumbullimet e prindërve para shkollave, mungesën e kushteve higjieno-sanitare në shkolla, mungesë e infrastrukturës etj.
Qeveria nuk ka investuar në platformat online!
Së pari, ka mangësi në njohuri dixhitale!
Sipas të dhënave të Byrosë së Statistikave të Bashkimit Evropian, Eurostat, 64 për qind e të rinjve nga mosha 16 deri në 24 vjeç në Maqedoninë e Veriut, disponojnë aftësi dixhitale nga 80 % që është shifra në vendet e BE-së.
Pandemia ka nxjerrë në pah rëndësinë e përdorimit të teknologjisë, sa i përket procesit edukativo-arsimor, por mangësitë që janë vënë re në Shqipëri gjatë karantinës, e bëjnë mësimin online më pak të pëlqyer. Shumë prindër janë ankuar se nuk kanë aftësi teknologjike mjaftueshëm për t’u ardhur në ndihmë fëmijëve.
Së dyti, mësimi online nuk është i arritshëm në të gjithë vendin.
Mangësi të natyrave teknike janë regjistruar kryesisht në zonat rurale, por edhe tek familje të shumta në nevojë të cilat nuk kanë akses në internet, apo që nuk kanë mjetet e nevojshme si celularë dhe kompjuter.
Pikërisht, të zhgënjyer nga mungesa e internetit falas, programeve që mundësojnë gjithëpërfshirjen, angazhimin e mësuesve dhe leksioneve aspak aktive, shumë nxënës, prindër e mësues në Shqipëri, zgjodhën alternativën e hapjes së shkollave në shtator, edhe përkundrejt rrezikut për përhapjen e infeksioneve.
Maqedonia e Veriu vendosi disa muaj më parë që familjet që marrin ndihma sociale do të furnizohen me internet mobile prej 10 GB në muaj, me qëllim që nxënësit të ndjekin mësimin online. Me këtë veprim, këtyre nxënësve do t’u sigurohet qasje në platformat për të ndjekur me sukses vitin shkollor përmes mësimit në distancë.
Smartphone dhe internet falas për nxënësit në Shqipëri!
Nxënësve duhet t’u krijohet mundësia që t’u jepen falas tabletat apo smartphone-t si dhe interneti cilësor që në shtëpi të zhvillojnë aftësitë në shkencë e teknologji. Në të kundërt mësimi i programimit që në klasë të parë fillore do të jenë të cunguara.
Prej vitesh, nxënësit, mësuesit dhe prindërit në Shqipëri, janë gënjyer me pretendimet se teknologjia do të ishte pjesë e mësimdhënies duke harxhuar miliona euro për klasat inteligjente dhe një duzinë burimesh financiare për Reformën Kurrikulare.
Por, teksa qeveria po humb kohë me mësimin në shkolla për të plotësuar dëshirat e disa grupeve të ndryshme, mund të kishte punuar në këto aspekte në mënyrë që mos të përsëritej skenari i periudhës mars-maj, ku qindra nxënës nuk patën mundësi të ndjekin mësimin online.
