Në një kohë që media duhet të tregohet e ndjeshme ndaj viktimave të abuzimit seksual dhe familjarëve të tyre, në Shqipëri u pa qartë se kjo pjesë lë shumë për të dëshiruar, kur rasti i 15-vjeçares së përdhunuar nga roja i shkollës në Babrru, u bë publik!
Në mediat shqiptare është krijuar një praktikë e gabuar informimi që sjell bërjen publike të informacioneve dhe detajeve të caktuara të një ngjarjeje kriminale, që nuk bëjnë gjë tjetër veçse ushqejnë kureshtjen e sëmurë të publikut dhe klikimet, por i bëjnë një dëm të madh personave të përfshirë në të!
Mjafton të përmendim rastin e 15-vjeçares, e cila u abuzua për së dyti, kur media të mëdha si Top Channel apo Vizion Plus, publikuan fytyrën dhe emrin e të atit të saj në kronikat e edicioneve qëndrore të lajmeve, duke e bërë të lehtë identifikimin e minorenes.
Në datën 1 qershor, Vizion Plus, shkoi deri aty saqë transmetoi një sekuencë ku mund të dallohet qartë emri i vajzës, për të mos folur për lagjen e saj, banesën, komshinjtë që folën dhe çdo detaj tjetër që identifikon minorenen, një shkelje e plotë kjo e ligjit nr. 97/ 2013 “Për mediat audiovizive në Republikën e Shqipërisë” dhe e etikës gazetareske.
Po ku është AMA kur duhet? Autoriteti i Mediave Audiovizive reagoi në po të njëjtën datë, më 1 qershor për të paralajmëruar mediat që të bëjnë kujdes me publikimin e detajeve që identifikojnë vajzën.
“ASHDMF dhe AMA kanë ndjekur me shqetësim publikimin e lajmeve mbi ngjarjet ku janë përfshirë fëmijët viktima. Bazuar në ligjin nr.18/2017, “Për të drejtat dhe mbrojtjen e fëmijëve” dhe në ligjin nr. 97/2013 “Për mediat audiovizive në Republikën e Shqipërisë”, i ndryshuar, apelojmë ndaj mediave, përfshirë dhe ato audiovizive për të respektuar parimet e ruajtjes së privatësisë dhe kofidencialitetit të fëmijës. Gjithashtu, u bëjmë apel mediave të respektojnë të drejtat e fëmijëve dhe të bëhen partnerë në parandalimin e abuzimeve me fëmijët, duke denoncuar edhe normat dhe sjelljet sociale që influencojnë abuzimin seksual të fëmijëve”, thuhej në një deklaratë të bërë publike po në 1 qershor.
Me sa duket AMA u mjaftua me një shkulje veshi për mediat që shkelën hapur të drejtat e një vajze 15-vjeçare, dhe askush nuk e vuri ujin në zjarr. Videot e kronikave mund të gjenden lehtësisht në YouTube tani që falsim.
Dhe meqënëse AMA e la me kaq, emisioni “Me Zemër të hapur”, përfitoi nga rasti dhe publikoi edhe videon e përdhunimit të minorenes në mesditë e për më tepër në sy të të atit të ftuar në studio.
Dje iconstyle.al dënoi këtë nëpërkëmbje të jetës së një vajze e cila rrezikon të ritraumatizohet nëse nuk tregohet ndjeshmëri në raportimin e lajmeve që kanë lidhje me jetën e saj, sipas psikologes Lediona Braho.
“Media duhet të tregohet shumë e ndjeshme ndaj viktimave dhe familjeve të tyre kur raporton rastet e dhunës dhe aq më tepër, dhunës seksuale ndaj të miturve. Ka nje kod etik që duhet respektuar dhe që përcakton qartë sesi duhet bërë raportimi për të respektuar dhe mbrojtur të drejtat e njeriut. Çfarë ndodh nëse kjo praktikë e mirë nuk respektohet? Shkelen me të dyja këmbët të drejtat themelore të njeriut”, u shpreh ajo në një prononcim për rastin në fjalë.
Menjëherë pas denoncimit që bëri iconstyle.al videoja e emisionit që shfaqte pamjet e përdhunimit, u bë private nga kanali i “Me zemër të hapur” në YouTube, ndërsa drejtuesja e emisionit Evis Ahmeti nuk shprehu në asnjë moment pendesë për këtë transmetim të turpshëm por përkundrazi, tha se u arrit qëllimi: që vajza të hiqej nga ambienti familjar dhe drejtori i shkollës të shkarkohej!
Pas gjithë këtyre shkeljeve të rënda ne nuk kërkojmë gjë tjetër veçse që AMA të marrë masa urgjente ndaj këtyre mediave që shkelën ligjet e raportimit dhe etikën gazetareske, pasi paralajmërimet nuk bëjnë punë kur bëhet fjalë për mbrojtjen e të miturve në Shqipëri!
Duhet t’i jepet fund kësaj praktike raportimi, e cila do të ndalë shumë viktima të abuzimit për të denoncuar rastin e tyre, vetëm nga frika se mediat mund ta kthejnë në një personazh publik!
/Iconstyle.al
