Nëse nuk shihni më policia pranë lagjes suaj atëherë kontrolloni në ajër! Policia e Tiranës ka gjetur një aleat të ri për ta ndihmuar në parandalimin dhe zbulimin e ngjarjeve.
Bëhet fjalë për një dron që arrin të monitorojë nga lartësia për 2 orë pa ndërprerje, por edhe të lëvizë me shpejtësi të lartë dhe të regjistrojë.
Ndonëse testimi i parë u krye në maj të vitit 2015 dhe zyrtarët e policisë deklaruan se brenda muajit do të vihej në zbatim projekti, policisë i janë dashur thuajse dy vite për ta vënë në jetë këtë plan.
Kjo për shkak të përgatitjes së një plani më të detajuar, vendosjes së kamerave në dron.
Kamerat do të jenë të lidhura me një server qendror dhe do të regjistrojnë pamjet njësoj si kamerat e trupit, me të cilat tashmë janë të pajisur punonjësit e policisë.
Për shkak të shpejtësisë së madhe me të cilën lëviz, droni mund të përshkojë disa zona të Tiranës vetëm për 3 minuta.
Mjeti fluturues i komanduar do të monitorojë rrugët kryesore të kryeqytetit, por edhe disa prej zonave që konsiderohen problematike dhe me risk për ngjarje kriminale.
