Teksa në media dita-ditës vijojnë të dalin në dritë raste të familjeve të prekura nga tërmeti shkatërrimtar i 26 nëntorit, të cilat ende kanë nevojë për strehim e ndihma, ditën e sotme, kryetari i Bashkisë së Tiranës, Erion Veliaj, ka vizituar një prej familjeve që së fundmi është sistemuar në një shtëpi të re me bonus qeraje.
Në vizitën e tij në familjen Hashani, Veliaj u shpreh se situata në kryeqytet po merrte zgjidhje, duke shtuar më tej se gjendja e emergjencës ka përfunduar. “Më rezulton se shumica i kanë gjetur banesat, pra mund të kenë mbetur tek-tuk ndonjë që do të akomodohet nesër, por ne nesër do t’i mbyllim të gjitha këto palestra sepse nuk dua që në Tiranë të ndihemi sikur jemi në luftë.”-u shpreh kreu i Bashkisë së Tiranës.
Por teksa fryma e pozitivitetit që Veliaj kërkon të sjellë është mëse e mirëpritur, deklarata e tij se gjendja e emergjencës ka mbaruar nuk është e tillë. Kjo për vetë faktin se jo vetëm në Tiranë, por edhe në fshatrat përreth situata vijon të jetë kritike.
Përgjatë dy ditëve të fundit, iconstyle.al ju ka njohur me historinë e çiftit Aliko që prej më shumë se 10 ditësh, vijonte të qëndronte në shtëpinë e tyre në katin e pestë në Kombinat në një pallat të shpallur të pabanueshëm.
Pa vënë gjumë në sy dhe të tronditur nga lëkundjet e njëpasnjëshme që kishin shkatërruar shtëpinë e tyre, dy të moshuarit nuk ishin larguar prej aty për arsyen e vetme sepse askush nuk u kishte dhënë një opsion për strehim.
Ishte iconstyle.al që me ndihmën e ndjekësve dhe kompanisë imobiliare “Century 21”, arriti t’u siguronte një shtëpi të re me qira të paguar për 6 muaj falë donacioneve të shumta, derisa shteti t’u ofrojë atyre një sistemim të përhershëm.
Gjatë zhvendosjes së çiftit Aliko, kuptuam se si ata, kishte dhe disa familje të tjera në një shkallë më tej të po të njëjtit pallat në zonën e Kombinatit, që nuk i linin shtëpitë për të njëjtën arsye, ndonëse një lëkundje tjetër e fuqishme mund të jetë fatale.
Një tjetër rast për të cilin iconstyle.al ka bërë apel për ndihmë është ai i zotit Flamur Dajçi, pronar i “Egi Center” në zonën e Unazës së Re. Në ndërtesën që është në listën e godinave për t’u prishur për t’i lënë vend projektit të Unazës së Re, zoti Dajçi ka hapur dyert për të pritur më shumë se 120 qytetarë të mbetur pa shtëpi pas tarmetit të 26 nëntorit, madje duke u shërbyer vullnetarisht edhe ushqim përtej mundësive të tij.
Godina 4-katëshe është e mbushur me dhjetra familje me fëmijë të vegjël e me një mori të sëmurësh, që jetojnë pa kushtet e nevojshme, duke rrezikuar madje përhapjen e sëmundjeve. E megjithatë institucionet shtetërore deri më tani nuk kanë ndërmarrë asnjë masë për të çuar situatën drejt normalizimit.
E njëjta situatë është dhe në fshatin Baldushk, që në këtë situatë duket se është harruar tërësisht nga autoritetet.
Me dhjetra familje kanë pësuar dëme të rënda në shtëpitë e tyre e vijojnë të qëndrojnë në çadra edhe në këto netë të ftohta, teksa në komunikimet me stafin e iconstyle.al, ata bëjnë të ditur se interesimi i vetëm nga institucionet shtetërore ka qenë nëpërmjet telefonatave.
Këto janë vetëm disa prej rasteve që iconstyle.al, me një staf tërësisht minimal, jo vetëm i ka zbuluar por edhe i ka ndjekur në vijimësi me shpresën që për secilin prej tyre mund të gjendet një zgjidhje. Por mjafton një dalje në zonat e prekura për të zbuluar një mori rastesh të tjera që ende kërkojnë zgjidhje, gjë që Bashkia do të duhej ta dinte më mirë se ne. Ndaj nëse Lali Eri mendon se gjendja e emergjencës ka kaluar, dikush duhet ta nxjerrë një xhiro nëpër Tiranë.
