Ajo që pritej të ishte nata më e bukur e vitit, për Turqinë u kthye në një terror. Një person i armatosur ka qëlluar në një klub nate në Stamboll , në lagjen e Beshiktash, në pjesën europiane të qytetit.
39 janë të vdekur mes të cilëve 15 të huaj dhe 69 të plagosur. Atentatori hyri në lokalin e famshëm, ‘Reina’, i veshur si Babagjyshi dhe ka hapur zjarr. E më pas është arratisur. Dëshmitarët dhe mediat lokale flasin në fakt për 2-3 persona të armatosur.
Bilanci është bërë i ditur nga guvernatori i Stambollit Vasip Sahin, i cili ka folur për një sulm terrorist. Sahin shtoi se sulmi është bërë nga një person i vetëm. Në lokal sipas mediave vendase ishin të pranishëm rreth 700-800 persona, ndërkaq që kërkime kanë nisur dhe për persona të cilët janë hedhur në ujë kur ka nisur sulmi, pasi klubi i natës është buzë detit.
Për Vitin e Ri masat e sigurisë në Turqi ishin rritur, me 17 mijë policë në shërbim, disa prej tyre për ironi të fatit gjithashtu të veshur si Babagjysh, njësoj si atentatori.
