Dy motra nga Tirana, Miranda dhe Flora Demi prej gati një muaji jetojnë në një tendë të sajuar me plastmasë pas shkollës “Servete Maçi”. Shtëpisë në të cilën jetonin prej vitesh i doli pronari dhe i nxori dy motrat në mes të katër rrugëve.
Në një rrëfim për “News 24” dy motrat kanë treguar se për të larë sytë në mëngjes përdorin një govatë me ujë, ndërsa për të kryer nevojat personale shkojnë tek komshinjtë ose tek lokalet që kanë pranë.
“Jam këtu që më 31 korrik, dhe asnjeri s’ka ardhur një herë të pyesë. Nga shteti, nga kjo qeveri, që të thotë çfarë krimi keni bërë që jetoni këtu. Falje nëse flas kështu, falje publikut të gjithëve, se më dhemb shpirti. Më dhemb shpirti. Kaq di të them.”, thotë njëra prej motrave.
Ato tregojnë se kishin 40 vite që jetonin në atë shtëpi, por që sot i përket dikujt tjetër.
“40 vite, që në ’78-ën. Kam ardhur fëmijë 10 vjeç, sot jam 50-vjeç. Para një viti e gjysmë kemi humbur edhe nënën. Jemi të dyja beqare. Kemi punuar gjithë jetën me drejtësi, nuk i kemi marrë borxh kurrë njeriu. Edhe me shtetin kemi qenë gjithë jetën në rregull. Kjo është një padrejtësi. Të vuash në mes të Tiranës dhe askush të mos interesohet”, thotë njëra prej tyre.
Motrat Demi tregojnë se si pronarit të vërtetë të shtëpisë i kishin paguar në vitin 2000 vlerën prej 6.2 milion lekë të vjetra si kapar, gjithçka e firmosur para noterit, madje kishin rënë dakord që objekti të blihej me këste me vlerën 25 milion të vjetra.
Mirëpo pas kësaj pronari është zhdukur derisa në muajin korrik komshiu iu kërkoi të dilnin nga shtëpia pasi e kishte blerë ai atë pronë.
“Del pronarja dhe e shet shtëpinë tonë me njerëz brenda, ndërkohë që ka marr kapar dhe nga ana jonë. 6 milionë e gjysmë një herë, 6.2 një herë dhe 500 euro një herë tjetër. Se aq i kishim mundësitë dhe për më mbrapa do mblidhnim, do të bënim çmos. E ka marr me autorizim shtetëror, me autorizim banesash e kam paguar qiranë muaj për muaj. Ajo ma kaloi në shitje. Bëmë kontratat, dhamë 7 milionë lekë dhe më pas ajo u zhduk fare”, tregojnë dy motrat.
Ato i kanë kërkuar pronarit të ri që t‘iu tregojë aktin e noterizuar apo tapinë e pronësisë së shtëpisë, por që asnjëherë nuk iu është vënë në dispozicion, as kur i nxorën me forcë të 10 anëtarët e kësaj shtëpie, ku i pranishëm ishte dhe nipi i tyre i sëmurë paraplegjik.
“Kemi patur shumë gjëra me vlerë brenda. Kanë bërë sikur i kanë nxjerrë raftet dhe pastaj gjërat e nënës tonë. Më ra të fikët, erdhi ambulanca, i thashë vëllait Beni motra jote po vdes.”, tregon njëra prej motrave.
Miranda dhe Flora bëjnë apel për ndihmë dhe mbi të gjitha drejtësi pasi pretendojnë se prona po iu vidhet pa asnjë dokument.
