Nëse do t’ju pyesnin se si e mendoni jetën e një princeshe, me siguri do të kishit parasysh, fustanet elegante, ballot, takime me princat, pushime në Evropë etj. Por Elia Zaharia na sjell më këmbë në toke kur tregon se jeta e saj tani që është martuar me Princ Lekën nuk është shumë ndryshe nga ajo e moshatareve të saj.
“Çdokush bën zgjedhjet e tij. Titulli Princeshë, për aq sa është në dobi të vendit, më stimulon të punoj më fort dhe ta prezantoj me sa më shumë dinjitet kombin tonë. Nëse prisni të them që jeta ime është ndryshe nga ajo e bashkë moshatarëve të mi, më vjen keq, por nuk do ta merrni këtë përgjigje. Ne të dy jemi me këmbë në tokë, të lidhur me realitetin, dhe si të tillë, përballemi me sfidat e shumta që ka Shqipëria,”- u shpreh Elia, duke thë se titulli i saj mbart më shumë përgjegjësi se aq.
Elia është kthyer nga Parisi me çmimin ‘Best’ në “Best Awards”, event që në 40 vitet e organizmit ka vlerësuar personalitete që vijnë nga fusha të ndryshme si arti, kultura, sporti apo filantropia.
“Përshkrimi që ata bënë kur më ftuan të tërhiqja çmimin ishte gjithëpërfshirës; si aktore shqiptare, gjithashtu si presidente e një fondacioni me punë të suksesshme. Por, mbi të gjitha, theksi u vendos te shërbimi që i bëra vendit tim nëpërmjet dasmës, reklamës pozitive, që ishte mjaft intensive në Europë, si edhe më gjerë”, shpjegoi princesha për gazetën Panorama.
