Enki Bracaj, e cila është njohur si spikerja që jepte lajmet “topless” në “Zjarr TV”, ishte e ftuar dje në emisionin e pasdites “Rudina”. Dalja e saj e parë si prezantuese lajmesh është komentuar shumë, jo vetëm në Shqipëri por edhe më gjerë.
Prestigjiozet si “Daily Mail” apo “Mirror” kanë shkruar për të duke e komentuar si spikerja që thyen tabutë.
Enki, e cila ka studiuar për Marrëdhënie me Publikun, ka rrëfyer nga studio e Rudinës se si e përjetoi eksperiencën si spikerja që prezantonte lajmet “topples”.
“Dalja me atë veshje ishte një risi për shikueshmëri. Në fillim, unë nuk mendova se do bënte aq shumë bujë, thashë: Po hë, se në internet do dalë, nuk do shikohet, por ndodhi ndryshe, u bë shumë e madhe. Nuk e mendova që për mua do flisnin mediat botërore si ‘Daily Mail’ apo ‘Mirror’”, tha Enki për këtë eksperiencë në ekran që, për të nuk ishte aspak e lehtë.
Enki tregoi se në fillim njerëzit e kanë paragjykuar dhe të gjithë i thoshin : “Ua, ç’pate ti, ishe mirë…”. Edhe për familjen e saj ky vendim nuk ishte i lehtë duke ditur shoqërinë paragjykuese në të cilën jetojmë.
“Para se të merrja këtë vendim për të qenë spikere, i thashë mamit: Shiko, do jap lajmet, por do jem pak e zbërthyer, por ajo nuk e mendoi ashtu. Kur më pa për herë të parë, më tha: Ti nuk je mirë.”, rrëfeu Enki.
Ajo tregoi se dhe për të ka qenë shumë e vështirë, madje që ditën e dytë ka menduar ta linte punën duke ditur që mënyra se si ajo shfaqej ishte shumë paragjykuese. Pavarësisht të gjithave Enki thotë se nuk pendohet për punën që bëri dhe në qoftë se do t’i jepej sërish mundësi ajo nuk është e sigurt nëse do ta bënte sërish.
Enki pas etiketimit si spikerja që prezanton lajmet “topless” ka marrë shumë oferta pune, një prej të cilave ishte nga “Play Boy” gjerman.
“Nuk ramë dakord për pagesën, sepse më ofruan 30 mijë euro dhe unë kërkoja 100 mijë euro. Të paktën të blija një shtëpi dhe një makinë. Jam penduar për shumë oferta. Por, një problem shëndetësor të një prej familjarëve të mi m’i ka shtyrë gjërat”,- sqaroi Bracaj.
