Këngëtarja Ronela Hajati u shpall fituese e këtij edicioni të “Festivalit të RTSH-së”, duke fituar mundësinë të na përfaqësojë të gjithëve në “Eurovision”.
Këtë vit, spektakli i famshëm do të mbahet në Itali ndërsa këngëtarja ka nisur prej kohësh provat për një performancë sa më të denjë në muajin maj.
“Sekret” është kënga super ritmike me të cilën Ronela do të përfaqësojë vendin tonë dhe si rrallëherë, një këngë shqiptare është kthyer në hit për të huajt dhe po pëlqehet kaq shumë.
Në shtete të ndryshme që ka vizituar dhe performuar si #PreParty e “Eurovision”, shqiptarja jonë ka ngritur në këmbë publikun dhe është pritur shumë ngrohtë nga fansat e huaj.
Mirëpo, një pjesë e mirë e shqiptarëve s’kanë pasur të njëjtën qasje. Që prej shpalljes së “Sekret” si këngë fituese, nisën edhe vërejtjet e shumta. Një pjesë nuk pëlqenin këngën, që s’i dukej aq e denjë për të na përfaqësuar, një pjesë tjetër kritikonte look-un e Ronelës në videoklip, të tjerë performancat e saj live…
Teksa të tjerët e shijojnë, kërcejnë e këndojnë me “Sekretin” e Ronelës, shqiptarët janë gati me telefona në duar për komentet negative.
Vetë Ronela është shprehur e zhgënjyer nga sjellja e shqiptarëve të saj, teksa thotë se është e vetëdijshme që s’do ta fitojë “Eurovision-in”. Megjithatë, jo vetëm se është shqiptarja jonë, por ajo meriton mbështetjen e të gjithëve për talentin, energjinë dhe punën e palodhshme për të na përfaqësuar këtë vit në “Eurovision”.
“E di si është puna? Kam pas ca përgjigje për këta, por zoti i ka lënë si mbetje ekologjike edhe duke qenë gjallë. Dhe mbi të gjitha më vjen turp të shohin të tjerët që shqiptarët përdorin gjuhë të tillë për njëri-tjetrin! Ne përfundimisht kemi shumë probleme të pazgjidhshme me veten tonë që arrijmë në këto grada! Unë nuk do ta fitoj kurrë Eurovisionin dhe as e mendoj. Por mbështetja nga artistët (që unë i kam ndihmuar pafund shumë prej tyre) ka qenë i pallogaritshëm! Më mbushen sytë me lot kur njerëzit e mi përdorin këtë gjuhë urrejtjeje mbi një këngë që nuk flet as për drogë as për 200 shampanja dhe as për 500 goca që mund t’i shëtisësh me Ferrari. Unë po nisem për Itali se kemi provat e fundit me baletin”, ka shkruar Ronela në një postim në InstaStory.
/Iconstyle.al
