Vala e dytë e pandemisë sa vjen e po bëhet më e ashpër. Rastet e shumta të infektimeve, por edhe të vdekjeve, kanë rënduar bilancin e Covid-19 në vendin tonë shumë këtë muaj.
Aktualisht në spitalet Covid janë të shtuar 471 pacientë, por nëse plotësohen kapacitetet e katër spitaleve Covid dhe ka mbingarkesë në strukturat mjekësore, autoritetet shëndetësore shqiptare kanë gati skenarë të tjerë: nga hapja e spitaleve rajonalë, deri te trajtimi në shtëpi apo dhe ngritja e strukturave në hotele e stadiume.
Shefi i Urgjencës, Skënder Brataj ka dalë vetë në terren për t’u kujdesur për të infektuarit me koronavirusit ditën e sotme teksa pamjet janë publikuar nga kryeministri Edi Rama dhe ministrja e Shëndetësisë.
Sa i përket kritikave të shpeshta për ezaurim të hapësirave, Brataj tha se vendi nuk ndodhet në fazën e ezaurimit, ndërsa shtoi se edhe nëse kjo do të ndodhte do të nisë trajtimi i pacientëve kudo që ka hapësira, në shtëpi, korridore, hotele dhe stadiume, si e gjithë bota.
“Jo nuk është problem mbingarkesa tani, sepse kur na rastis një numër i madh, ne mundohemi që t’i shpërndajmë në spitalet COVID. Nuk jemi në atë pikë, – tha kreu i Shërbimit të Urgjencës Kombëtare. -Jemi akoma në skenarin 3, pra të COVID 3, do hapet i katërti, do hapen spitalet rajonale me skenarë të ndryshëm. Kur t’i mbushim të gjitha, do t’i trajtojmë edhe në ambulancë, edhe në banesë edhe nëpër korridore, hotele, stadiume, siç po bën e gjithë bota. Qytetarët do të asistohen në çdo lloj mënyre, qëllimet e tjera në këtë moment, jashtë aspektit shëndetësor, duhet vetëm të heshtin”, – theksoi Brataj.
Shefi i Urgjencës, tha se që nga fillimi i pandemisë janë bërë mbi 623 mijë thirrje në urgjencë. “Mbi 11 mijë vizita për COVID-19 janë realizuar në banesë. Kur kam ardhur, shërbimi i Urgjencës ishte i fragmentuar. Nuk kishim kapacitetin se sa njerëz kishin nevojë për njësi mjekësore”, u shpreh ai.
