Aktori i njohur Jamie Foxx tha se shkoi në ‘ferr dhe u kthye’ teksa foli për herë të parë që nga shtrimi në spital pas një ‘komplikimi mjekësor”.
Fituesi i çmimit “Oscar”, u shfaq i përlotur teksa shpalosi përvojën që kaloi në një video emocionuese në Instagram.
“Kam kaluar diçka që mendoja se nuk do ta kaloja kurrë”, tha Foxx, duke informuar 16 milionë ndjekësit e tij se nuk është ‘i verbër’ apo ‘i paralizuar’.
“E di që shumë njerëz prisnin ose donin të dëgjonin një përditësim, por të jem i sinqertë me ju, nuk doja që ju të më shihnit si ai njeri”, pranoi aktori mes lotësh.
“Dua që të më shihni duke qeshur, duke kaluar një kohë të mirë, duke festuar, duke bërë shaka, duke bërë një film ose një shfaqje televizive. Unë nuk doja që ju të më shihnit me tuba dhe duke u përpjekur të kuptoja nëse do t’ia dilja mbanë”, vazhdoi ylli i famshëm.
Aktori nuk e bëri të ditur sëmundjen e tij, por në fund tha se është “në rrugën e shërimit”.
Foxx falenderoi motrën e tij, Deondra Dixon dhe vajzën, Corinne Foxx, 29 vjeçe, që e ndihmuan dhe i mbajtën sekret gjendjen e tij.
