James Van Der Beek ka përshkruar momentin kur u diagnostikua me kancer të zorrës së trashë në fazën 3, duke e quajtur atë gjënë më të mirë që i ka ndodhur ndonjëherë.
Në një intervistë me emisionin Today, i cili u transmetua të premten aktori foli për reagimin e tij të parë kur mësoi në vitin 2023 se kishte kancer. “Isha i shokuar”, tha fillimisht James Van Der Beek, duke shtuar se në të njëjtën kohë ndjeu një emocion të veçantë: “Kur dëgjova lajmin, mendova, ‘Kjo do të jetë gjëja më e mirë që më ka ndodhur ndonjëherë'”.Ai shpjegoi se dëgjoi “një zë të vogël” në kokën e tij duke i thënë: “Do të bësh ndryshime në jetën tënde që nuk do t’i kishe bërë kurrë nëse nuk do të kishe pasur një diagnozë kaq ekstreme, dhe kjo do t’i shtojë vite të shëndetshme dhe të lumtura jetës tënde”.
Ai tha se përvoja e sëmundjes e solli më afër një ndjenje të ndryshme të kujdesit për veten. “Nuk mendoj se e dija se çfarë do të thoshte të ngadalësoja më parë”, tha ai, duke shtuar se nuk e kishte zakon të vëzhgonte me kujdes “gjithçka që ha, gjithçka që fus në trupin tim”. Duke përshkruar ndryshimin më të madh që kur foli publikisht për diagnozën e tij, ai vuri në dukje se është në ” një udhëtim dashurie për veten”.
Në të njëjtën intervistë, aktori foli për vlerën e pranimit, duke thënë: “Ajo që kuptova është se unë ende meritoj dashuri, dashurinë time, dashurinë e Zotit.” Në të njëjtën kohë, ai u përqendrua në një element tjetër që, siç thotë ai, përvoja e kancerit i “dha” atij: prania në të tashmen. “Mendoj se para kancerit i merrja këto momente të vogla dhe të bukura si pjesë të një të tëre”, tha ai, dhe më pas tha: “ Tani mund t’i kushtoj shumë më tepër vëmendje një momenti që ia vlen. Pra, të jetosh në të tashmen është vërtet dhurata që më dha kanceri.”
Van der Beek, i cili ka gjashtë fëmijë me gruan e tij Kimberly, iu referua gjithashtu rolit të familjes së tij në këtë udhëtim, duke theksuar në veçanti kontributin e gruas së tij. “Nuk do të isha gjallë nëse nuk do të ishte për gruan time”.
