Mëngjesin e së premtes mbërritën në Rinas 121 afganët e parë, një pjesë e së cilëve kanë punuar për organizatën “Shoqëria e Hapur”, ndërkohë pjesa tjetër janë aktorë, anëtarë të shoqërisë civile bashkë me familjet e tyre.
Ata shkelën në tokën shqiptare në orën 03:20 të mëngjesit të së premtes dhe mes tyre ishin edhe 11 foshnja.
Pasi iu nënshtruan përpunimit të të dhënave individuale, regjistrimit dhe më pas ekzaminimeve mjekësore në çadrat e ngritura në Rinas posaçërisht për ta, u drejtuan në një nga resortet më luksoze në zonën e Golemit, ku një natë kushton rreth 18 mijë lekë (të reja).
Vendi ku ndodhen të evakuuarit nga Kabuli, ruhet nga forca të shumta policie, të Policisë së Shtetit dhe me roje sigurie private.
Së fundmi i biri i George Soros, themeluesit të “Shoqëria e Hapur” ka takuar shtetasit afganë që ndodhen në vendin tonë, të cilët janë pjesë e kësaj organizate.
“Këto ditë kam pasur privilegjin të takoj kolegë nga @opensocietyfoundations Afghanistan dhe të evakuuar të tjerë nga Afganistani që janë sjellë në Shqipëri. Ky grup përfshin gazetarë, mbrojtës të të drejtave të njeriut, nëpunës civilë, artistë dhe familjarë të tyre. Pamja e fytyrave të tyre përballë asaj që sapo kishin duruar ishte absolutisht frymëzuese.”-ka shkruar Alex Soros.
Nga ana tjetër, afganët që kanë ardhur në ditët në vijim janë strehuar në konviktet e Qytetit Studenti, ku dhe vijojnë jetën e tyre.
Dhe në mes të gjithë kësaj irone, lind pyetja: Pse bëhet ky lloj diferencimi edhe mes shtetasve të evakuuar, të cilët janë larguar nga vendi i tyre për një qëllim të vetëm?
Cili është “çelësi” për të hapur dyert e luksit në Shqipëri?!
