Kam një problem shumë të madh që më shqetëson kohët e fundit, saqë mendoj se kam rënë në depresion. Nuk e kam pasur jetën aspak të lehtë, por deri para disa muajve kam qenë shumë e fortë dhe optimiste. Mirëpo u njoha me një mashkull që e dua tmerrësisht shumë, por gjërat mes nesh shkuan keq. Nuk arritëm të rrinim bashkë nga fakti se ai vjen nga Lindja e Mesme dhe unë nga Shqipëria. Familja e tij nuk më donte dhe ai zgjodhi ata. Mirëpo vazhdojmë të flasim çdo ditë. Ai është shumë pesimist, i mendon gjërat negative dhe që kur e njoh, ma ka përcjellë këtë gjë. Nuk arrij dot të ndahem prej tij, më duket sikur po mbytem. Po të qëndroj edhe një orë pa folur mendoj vetëm gjëra të këqija, nuk përqendrohem dot. Më duket sikur jam larguar nga të gjithë. Madje jam ftohur me fëmijët e mi, më duket sikur s’kam durim më me ta, sikur nuk po i gëzoj më. Gjithçka më ka faj, por ama s’arrij as të shprehem me dikë se s’kupton askush atë që ndjej unë. Jam shumë e dobët, nuk kam oreks dhe pi më shumë cigare se normalisht. Çfarë mendoni Ju?
Përshëndetje e dashur lexuese! E kuptoj dhe më vjen keq për gjendjen e vështirë emocionale që ti po përjeton tani, si dhe për faktin që nuk e ke pasur jetën të lehtë. Shqetësimet që ke renditur më sugjerojnë fillesën e një gjendjeje depresioni, fill pas ndarjes nga personi që ti dashuron. Nga letra jote kuptoj që bëhet fjalë për një lidhje të pamundur, së pari, për shkak të distancës mes jush dhe së dyti, për shkak se familja e tij nuk të pranon.
Mirëpo, arsyeja kryesore, për mendimin tim, që e bën të pamundur këtë lidhje, është fakti që ai ka zgjedhur familjen dhe jo ty. Përse e ka bërë ai këtë zgjedhje? A mund t’i thuash dhe ta bindësh veten se ai duhet të të zgjidhte ty dhe kjo do të ishte e vetmja arsye logjike për të ushqyer marrëdhënien me të dhe për t’i kushtuar kaq shumë energji nga jeta jote? A e ke menduar se duke mos të zgjedhur ty, ai ta ka dërguar mesazhin direkt se nuk mundet të jetë me ty? Më tej, cila është arsyeja jote për të kërkuar diçka të pamundur? Në cilën fazë të jetës tënde erdhi ai njeri dhe a po kërkoje diçka tjetër nga jeta, që nuk e kishe?
Të kuptoj plotësisht nëse e ke të vështirë t’i pranosh këto fakte dhe të përdorësh arsyen për ta analizuar situatën, në një kohë kur ndjenjat e tua janë shumë të forta dhe mbytëse. Mirëpo, unë të ftoj që ti ta shohësh në mënyrë të arsyeshme situatën, të bësh një testim të realitetit dhe të kuptosh sa janë shanset e vërteta që ti të jesh me të.
Mesa duket nga letra jote, këto shanse janë minimale. Distanca, mospranimi, pesimizmi i tij. Ajo që ma përforcon më tepër këtë mendim është mënyra sesi ai po të ndikon ty, përmes mendimeve të tij negative. Nëse ai do të kishte mendime dhe qëndrime pozitive, nëse do të të kishte zgjedhur ty dhe jo familjen, atëherë do t’ia vlente që ti të shqetësoheshe për të gjetur mënyra për të qëndruar bashkë. Një njeri që nuk të ka zgjedhur ty, për arsyet që ke listuar, do të thotë që nuk mundet të jetë me ty dhe të të japë atë që kërkon dhe meriton. Për çfarë të shërben ty të menduarit kaq shumë dhe kaq gjatë për dikë që nuk mundet të jetë me ty, përveçse në distancë? Asnjë marrëdhënie e ngjashme me atë që më tregove, nuk mundet t’i mbijetojë distancës.
Prandaj, unë të këshilloj që ti të fillosh të tregosh kujdes për veten tënde dhe të fillosh t’i shohësh njerëzit dhe mjedisin që të rrethon si burime mbështetjeje. Fëmijët kanë nevojë të rifitojnë vëmendjen dhe përkujdesjen tënde. Duke u marrë më tepër me fëmijët do të fillosh të ndihesh përsëri më mirë. Në letër më përmend vetëm fëmijët, a ke familjarë të tjerë? Nëse po, duhet të afrohesh përsëri me ta. Kërko ndihmë nga mikesha ose miq dhe përfshihu në aktivitete, të cilat do të të bëjnë të ndihesh e dobishme. Kështu mund të luftosh me atë ndjesinë e mbytjes dhe do të rizgjosh energjitë dhe optimizimin brenda vetes. Pjesë e kujdesit për veten mund të jetë edhe këshillimi tek një profesionist për të kapërcyer gjendjen e vështirë psikologjike në të cilën ndodhesh.
Të përshëndes dhe të uroj Gëzuar Festat!
*Lediona Braho, psikologe klinike
Për Iconstyle.al
