Vrasja ditën e sotme e Asem Abu Rakaba, kreut të grupit ajror të Hamasit, pritet të sjellë përshkallëzim të luftës Izrael-Palestinë. Lajmi është konfirmuar nga ushtria izraelite përmes një postimi në platformën ‘X’, ku shkruan se ka vrarë njeriun që komandoi luftëtarët e Hamasit që arritën të hynin në Izrael më 7 tetor dhe dyshohet se ishte përgjegjës për sulmet me dronë në postet ushtarake izraelite.
“Brenda natës, avionët luftarakë të IDF-së goditën Asem Abu Rakaba, kreun e grupit ajror të Hamasit. Abu Rakaba ishte përgjegjës për UAV-të e Hamasit (mjetet ajrore pa pilot. Në anglisht unmanned aerial vehicles), dronët, deltaplanë, zbulimin ajror dhe mbrojtjen. Ai mori pjesë në planifikimin e masakrës së 7 tetorit dhe komandonte terroristët që u infiltruan në Izrael me deltaplanë dhe ishte përgjegjës për sulmet me dronë në pozicionet ushtarake izraelite”, shkruan ushtria izraelite.
Mbrëmjen e djeshme 27 tetor forcat ajrore dhe tokësore izraelite zgjeruan sulmet e tyre ndaj Hamasit në Rripin e Gazës dhe grupi militant palestinez konfirmoi se luftëtarët e tij po shkëmbenin zjarr me forcat izraelite në disa vendndodhje përgjatë kufirit me Izraelin, përfshirë në Bureij.
Lufta Izrael-Palestinë (përditësimi i fundit)
Konflikti në Gaza filloi më 7 tetor kur grupi palestinez Hamas nisi Operacionin Al-Aksa Flood, një sulm i papritur me breshëri raketash dhe depërtimesh në Izrael nga toka, deti dhe ajri. Hamasi tha se inkursioni ishte në hakmarrje për sulmin ndaj xhamisë Al-Aksa dhe dhunës në rritje nga kolonët izraelitë kundër palestinezëve. Ushtria izraelite më pas nisi një bombardim të pamëshirshëm të objektivave të Hamasit në Rripin e Gazës. Më shumë se 7,900 njerëz janë vrarë në konflikt, duke përfshirë të paktën 6,546 palestinezë dhe 1,400 izraelitë. 2.3 milionë banorëve të Gazës kanë mbetur pa ushqim, ujë, ilaçe dhe lëndë djegëse, dhe autokolonat e ndihmave të lejuara kohët e fundit në Gaza kanë bartur vetëm një pjesë të asaj që nevojitet.
