Situata e Italisë me epideminë e koronavirusit duket se dita-ditës po përkeqësohet më shumë, ndonëse prej dy javësh masat për izolim janë ashpërsuar gjithnjë e më shumë. Por pavarësisht gjithçkaje, shifrat tregojnë të kundërtën e asaj që ekpertët prisnin të shihnin, duke shënuar në 24 orët e fundit dhe bilancin më tragjik me 475 të vdekur.
Në këtë situatë, nuk janë të paktë ata që po e shohin me dyshim strategjinë e izolimit, duke vënë në diskutim nëse një gjë e tillë ia vlen përpara rënies drastike ekonomike që po përjeton vendi. Ka pak të dhëna inkurajuese që tregojnë se pas ashpërsimit të masave ka një rënie të vogël të të prekurve në Italinë Veriore, megjithatë, sipas “CNN”, është ende shumë herët për ta marrë këtë si një tregues të mirëfilltë.
Por si shpjegohet që edhe pas izolimit shifrat vijojnë të rriten frikshëm?
Sipas Dr. Giorgio Palù, ish-kryetar i Shoqërisë Europiane dhe Italiane për Virologjinë, gjërat duhet të kishin ndryshuar 10 ditë pas marrjes së masave izoluese, por kjo nuk ndodhi dhe sipas tij, arsyeja ëhstë pikërisht vonesa e marrjes së këtyre masave.
“Izolimi duhet të ishte më i gjerë dhe duhej marrë më herët. Duhet të kishim bërë më shumë teste në Lombardi ku ishte epiqendra. Nuk ka kuptim të shkosh në supermarket një herë në javë. Duhet limituar koha jashtë shtëpisë sepse izolimi është çelësi.”-shprehet ai.
Sipas Palù, qeveria italiane u tregua “përtace” në fillimet e krizës dhe shkaktare është politika.
“Kishte një plan për të izoluar njerëzit që vinin nga epiqendra, që vinin nga Kina. Pastaj ky u pa si gjest racist… por ata vinin nga një shpërthim epidemik! Kjo ka sjellë në këtë situatë shkatërrimtare.”-shprehet mjeku i famshëm. Sipas tij, ndonëse izolimi deri tani nuk ka sjellë përmirësim të shifrave, gjithësesi nuk ka plan B.
Sakaq, sipas Dr. Alessandro Grimaldi, mjek infeksionst në spitalin “Salvatore” në Aquila, një tjetër arsye e krizës COVID-19 në Itali ishte fakti që qeveria nuk mori në kohë masat e duhura përsa i përket mjeteve të nevojshme për të luftuar virusin.
“Mbase qeveria duhej ta kishte menduar më parë këtë, të ishte përgatitur më mirë. Por kur nuk e sheh emergjencën para syve, ke tendencën të kursesh.”-shprehet Grimaldi duke shtuar se nëse mjekëve nuk do t’u jepen pajisjet që kërkohen, situata do vijojë të jetë e tillë.
Mjeku infeksionist gjithashtu shton se e vetmja mënyrë që izolimi të japë rezultatin që pritet, është që masat të bëhen sa më agresive.
Deklarata të tilla na sjellin tek masat e izolimit të ndërmarra dhe në Shqipëri, ku ka pasur jo pak kundërshtime mbi urdhërat drastikë e kryeministrit Rama. Por mesa duket, nëse nuk do të duam të kemi të njëjtin fat me Italinë fqine ku numri i të vdekurve po shkon në 3000, do të na duhet të bëjmë më të mirën e të qëndrojmë në shtëpi, derisa ky izolim të japë rezultat.
