Gazeta britanike “The Sun” bëri të ditur disa orë më parë se këngëtares shqiptare Dua Lipa i ishin pezulluar xhirimet për videoklipin e saj të ri, pasi nuk kishte zbatuar rregullat anti-Covid.
“Dua dhe shoqëruesit e saj po i shijonin në maksimum xhirimet, por për ata që jetonin përreth tyre, xhirimet ishin një makth”, tha një banor i zonës sipas “The Sun”, ndërsa shtoi se “dukej sikur njerëzit në xhirime po thyenin rregullat dhe distancimi shoqëror ishte plotësisht i përjashtuar”.
Por, këto lajme duket se e kanë revoltuar këngëtaren shqiptare, e cila ka reaguar nëpërmjet InstaStory-t duke shkruar një status të gjatë.
25-vjeçarja ka hedhur poshtë fjalët se xhirimet ishin ndërprerë për këtë fakt, teksa bën të ditur se avokatët e saj kanë kontaktuar tashmë me gazetën.
“Një gazetë tabloide në Mbretërinë e Bashkuar (së cilës nuk do t’i bëj reklamë falas duke e përmendur), natën e kaluar publikoi një artikull rreth xhirimeve të videos time në Londër duke thënë se janë shkelur rregullat kundër Covid. Kjo është plotësisht e pavërtetë, absolutisht të gjitha udhëzimet janë respektuar. Kjo është një nga shumë historitë e pavërteta të botuara nga kjo gazetë për mua këtë vit. Avokatët e mi i kanë dërguar një letër gazetës sot.
Është për të ardhur keq se një pjesë e shtypit britanik kërkojnë vëmendje për të shitur artikuj sesa të flasin për të vërtetën apo për ndjenjat e personit për të cilin shkruajnë. Ka patur shembuj jo të mirë vitin e fundit duke përfshirë personazhe të njohur britanikë, por unë do ta mbaj qëndrimin tim.“, ka shkruar Dua.
