Fifi është padyshim një nga këngëtaret më të mira në industrinë e muzikës shqiptare që ka ditur gjithmonë si të vjedhë zemrat e publikut, sidomos me baladat e saj të famshme.
Edhe kësaj here, këngëtarja ka sjellë një baladë dashurie që na goditi drejt e në zemër që me dëgjimin e parë.
“Ninullë dashnie” titullohet kënga e re që ndodhet në Spotify (KLIKO), teksa ende nuk është publikuar në You Tube. Në fakt, Fifi kishte planifikuar që ajo të publikohej ditën e sotme, por producenti i këngës nuk ishte i këtij vendimi.
Si duket klipi kishte nevojë për disa rregullime ngjyrash e rrjedhimisht, publikimi i këngës është shtyrë për ditën e nesërme, në orën 16:00.
Në videot e publikuar në Instastory Fifi shprehet me nota humori:
Unë e kam caktu që kënga ime e re me klip të dilte sot, por Erkand Shabani po thotë diçka “ngjyrat ngjyrat” dhe nëse nuk del klipi sot më besoni se është faji i Erkandit.
Ndërkohë në fillim të vjeshtës solli një tjetër bashkëpunim. Këtë herë ajo bashkoi forcat me kushëririn e saj Ermal Fejzullahu për të sjell super këngën “Përjetësi”.
Videoklipi i kësaj kënge ka një histori tepër interesante të një çifti të dashuruar dhe menjëherë pas publikimit, kënga ka marrë miliona klikime në Youtube.
Por, Fifi s’ka ndërmend të heqë dorë nga duetet. Së shpejti ajo do publikojë një këngë me reperin e njohur Bardhi, i cili bëri namin me këngën “Betohemi”.
Vetëm disa ditë më parë, Bardhi publikoi këngën e re “Interes”, që po pëlqehet shumë nga publiku.
