Xhuljana Çuni ishte nisur të premten për të dhënë provimin e radhës së Maturës, në shkollën e mesme ku studionte prej 3 vitesh, “Qemal Stafa”. Vend në të cilin nuk arriti dot, pasi ish-i dashuri i ndërpreu rrugën duke i dhënë fund jetës së 19-vjeçares.
Maturantja u qëllua dy herë me pistoletë nga 31-vjeçari Xhafer Mata, i cili më pas kreu vetëvrasje.
“Balkanweb” tregon rrëfimin e shokëve të shkollës, të cilët thanë se emri i Xhulit u thirr nga mësuesit por ajo nuk u paraqit. Pak orë më vonë pas mbarimit të provimit, bashkëmoshatarët e saj mësuan fatin tragjik të 19-vjeçares. Mësuesit dhe nxënësit që e njihenin Xhuljanën thanë se ajo ishte një vajzë e urtë dhe nuk hapte probleme.
Ditën e sotme familja hapi dyert e mortit dhe përcolli për në banesën e fundit adoleshenten. Familjarët e quajnë një padrejtësi atë që i ndodhi Xhuljanës, ndërsa mohuan historinë që është shkruar nëpër media nga dita e djeshme.
Nga ana tjetër, familja e Xhafer Matës, të cilët pranuan se e dinin marrëdhënien e tij me Xhulin, nuk e prisnin që ajo të arrinte deri në vrasje.
