Edhe pse ende nuk e kanë ngritur kokën nga kriza ekonomike e pandemisë, tanimë vendimi i qeverisë për mbylljen e klubeve të natës, diskove, si dhe lounge bareve në ambient të hapur apo të mbyllur, u ka rënë si një bombë këtyre bizneseve në vend, për vetë faktin se mbetet shumë i paqartë dhe i pastudiuar.
Muzika live nuk ka qenë lejuar që nga muaji mars e megjithatë abuzime ka pasur nga lokale të ndryshme, të cilat janë shoqëruar edhe me gjoba. Por duket sikur këto rregulla dhe masa ndëshkimore aplikoheshin nderi në qytetin e Durrësit, pasi në resortet e jugut, ka pasur shumë abuzime për të cilat u mbyllën të dy sytë.
Por çfarë po ndodh aktualisht me këtë sektor?
Të gjunjëzuar nga pandemia globale dhe me vendimin e nxituar të qeverisë për ndalimin e punës në këto biznese, situata duket se po përshkallëzohet drejt një krize të madhe.
Kryetari i Shoqatës së Lokaleve dhe Restoranteve, Enri Jahaj tregoi sot për “iconstyle.al” se ky sektor ka qenë një ndër më të penalizuarit si nga klientela, e cila ka rënë pas pandemisë, ashtu edhe nga qeveria e cila nuk po u ofron mbështetje.
Jahaj tregon vështirësitë e mëdha që po has aktualisht sektori i bareve dhe restoranteve në vend, duke nisur nga njerëzit e papërgjegjshëm që shkelin protokollin e distancimit fizik, te rënia e klientelës. Ai madje shprehet se nuk ka të dhëna që baret apo klub-et janë vatër infeksioni:
“Virusi është me nesh, është agresiv dhe vepron pa e kuptuar, por në këtë situate ne kemi qenë më të penalizuarit qoftë nga klientela qoftë nga qeveria. Nuk ka të dhëna se infektimi i popullit vjen nga ne për këtë arsye nuk kuptojmë vendimin. Pas pandemisë po hasim vështirësi nga më të ndryshmet. Mungesë të theksuar klientele, restorantet janë thjesht inekzistente, klientët nuk i frekuentojnë, panik në njerëz por edhe mosdistancim fizik nga klientela e papërgjeshme”.
Kush quhet lounge dhe kush quhet bar?
Sa i qartë është vendimi i qeverisë për ndalimin e punës në këto biznese? Jahaj shprehet se vendimi është i paqartë, pasi lihet të interpretohet se kush quhet lounge dhe kush quhet bar apo restorant.
“Problemi është si transmetohet lounge dhe bar dmth tani ky vendim nuk është shume i qartë pasi lihet të interpretohet në terren se kush quhet lounge, kush bar, kush restorant etj. Po, ne duam t’i respektojmë protokollet po duhet bërë një sensibilizim më i madh pasi ende sheh rrugëve njerëz që përqafohen e takohen si me parë”.
Jo më kot dje nëpër rrjetet sociale pati një reagim të madh me meme-t “Ishte Night Club, u bë Night Pizzeria”, nga të gjithë njerëzit, si nga artistë që sigurojnë të ardhura nga muzika live por edhe nga biznese, për të treguar realitetin e hidhur që na pret
Pjesë e vendimit ishte edhe ndalimi i muzikës pas orës 20.00 në të gjithë mjediset e shërbimeve të çfarëdolloji. Mosrespektimi i këtij detyrimi nga subjektet, dënohet me gjobë 1 000 000 lekë dhe në rast përsëritje, me pezullim te aktivitetit për një periudhë gjashtë mujore.
Përballë këtij vendimi, Industria e Lokaleve të Natës ka nisur protestën përballë kryeministrisë, nën moton: “Na lini të shërbejmë”!
Kryetari i Shoqatës së Lokaleve dhe Restoranteve shprehet se gjatë kësaj periudhe ka pasur gjoba dhe këshillime për biznese të ndryshme të cilët nuk respektonin protokollin e vendosur, por problemi kryesor sipas tij është individi, i cili nuk është ndërgjegjësuar ende.
Duhet ndërgjegjësim!
Dhe në fakt, qeveria duhet të bëjë më tepër për ndërgjegjësimin e njerëzve, pasi askush nuk po mjaftohet aktualisht me një buletin ditor të ministrisë për të infektuarit, apo intervistat e përditshme të mjekëve Infeksionistë që po përsëritin të njëjtat gjëra në çdo televizion: “Do të kthehet apo jo virusi në shtator?!”, në një kohë që ai nuk ka ikur ndonjëherë!
Duhen dëshmi! Dëshmi të atyre që e kanë përjetuar nën lëkurën e tyre virusin, frikën e humbjes së një të afërmi, apo të bluzave të bardha që po luftojnë dita ditës me virusin në spitalet COVID.
Gjatë kontakteve me bluzat e bardha që punojnë tek Infektivi kemi pasur shpesh herë ne si media refuzime të tilla si: “Do të na heqësh nga puna!” vetëm sepse kemi kërkuar informacion sesi po e përballon një mjek apo infermier situatën me virusin!
Kjo thirrje u drejtohet edhe atyre të mbijetuarve nga COVID-19, ose dhe atyre që ende po luftojmë me virusin nga vetëkarantinimi, që të jenë më të hapur për të na treguar përvojat e tyre, në mënyrë që edhe ne të mos bëjmë “gabimet” e tyre.
/Iconstyle.al
