Tre të rinj, të cilët ishin duke festuar bashkë me rrethin shoqëror e familjar, në një lokal te Rruga e Kavajës në kryeqytet, rreth orës 01:30 kanë mbetur të plagosur me armë zjarri. Sipas policisë, ata janë plagosur aksidentalisht nga shoku i tyre i cili ishte bashkë me to.
32-vjeçari E.E dyshohet se aksidentalisht, me një armë zjarri të cilën e mbante pa leje, ka bërë një shkrepje të pavullnetshme, dhe si pasojë e saj janë dëmtuar shtetasit e mësipërm. Për pasojë kanë mbetur të plagosur E. P., 36 vjeçe, A. P., 36 vjeç, dhe D. P., 34 vjeç, të cilët janë dërguar në një spital privat. Policia thotë se D. P., dhe A. P., pas marrjes së ndihmës mjekësore janë larguar për në banesë, ndërsa E. P., ndodhet në spital, nën kujdesin e mjekëve, jashtë rrezikut për jetën.
NJOFTIMI I POLICISË:
‘Më datë 23.07.2024, rreth orës 01:35, janë paraqitur në një spital privat, për ndihmë mjekësore, shtetasit E. P., 36 vjeçe, A. P., 36 vjeç, dhe D. P., 34 vjeç, me dëmtime të shkaktuara dyshohet nga armë zjarri. Këta shtetas, rreth orës 01:30 të mëngjesit të sotëm, kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës.
Nga tërësia e veprimeve hetimore paraprake është bërë i mundur identifikimi i autorit të dyshuar, shtetasit E. E., 32 vjeç, banues në Tiranë. Ky shtetas dyshohet se aksidentalisht, me një armë zjarri të cilën e mbante pa leje, ka bërë një shkrepje të pavullnetshme, dhe si pasojë e saj janë dëmtuar shtetasit e mësipërm.
Shtetasit D. P., dhe A. P., pas marrjes së ndihmës mjekësore janë larguar për në banesë, ndërsa shtetasja E. P., ndodhet në spital, nën kujdesin e mjekëve, jashtë rrezikut për jetën. Grupi hetimor, nën drejtimin e Prokurorisë, po vijon punën për dokumentimin e plotë ligjor të këtij rasti dhe kapjen e shtetasit E. E.’- njofton policia.
