Artistja e njohur shqiptare, Justina Aliaj, që u shtrua në gjendje të rëndë në spitalin Infektiv muajin e shkuar është drejt shërimit nga Covid-19. Ajo po qëndron prej disa javësh në spital dhe fatmirësisht po e kalon periudhën më të vështirë.
Pas kaloi disa ditë në terapi intensive, Aliaj ka treguar se si e ka përjetuar këtë moment. Artistja ka rrëfyer se për disa ditë ka pasur temperaturë të lartë, lodhje mendore, këputje trupi, dhimbje muskujsh. Justina është shprehur se nuk ka pasur shpresë për të jetuar dhe se mjekët ishin e vetmja shpresë për ta mbajtur gjallë.
Si përfundim ajo iu ka dhënë gjithë qytetarëve një mesazh, që të tregojnë kujdes dhe që t’i mbajnë gjatë gjithë kohës maskat.
“Sëmundjen që më zuri e kam përballuar vështirë dhe keq sepse nuk e dija diagnozën. Kështu rrodhën ditët me temperaturën 39 e gjysmë dhe vazhdoi mjekimi. Kjo zgjati dy tre ditë në shtrat dhe ishte një përjetim i tmerrshëm me një këputje të jashtëzakonshme me një lodhje mendore të jashtëzakonshme dhe muskujt sikur ishin shkëputur nga kockat.
Isha pa shpresë. E vetmja shpresë ishte se më mbajtën gjallë doktorët. Nuk e harroj asnjëherë. Ata vinin dhe më thonin se ti do dalësh nga këtu e shëndoshë. Tritan Kalo vinte me atë sigurinë e tij për të dhënë shpresën se do dalësh mirë.
Kam vetëm një apel për të gjithë popullin shqiptar, ata e dinë, e shohin, e kanë parë, shpresoj që nuk do e kalojnë këtë mënyrë, që na ka pllakosur në derë, ju lutem 1 mijë herë: Mos i hiqni maskat, maska sot është jeta juaj, mos provoni atë që provuam ne, ju mjafton eksperienca jonë”, shprehet Aliaj.
