Një raketë balistike ka goditur drejtpërdrejt ambientet e spitalit Soroka në qytetin jugor të Beershebës, sipas njoftimeve të autoriteteve izraelite, duke shënuar një moment kritik në përshkallëzimin e tensioneve rajonale.
Ministria e Jashtme izraelite konfirmoi incidentin përmes një postimi në rrjetin ‘X’, ku u theksua se bëhej fjalë për “një goditje direkte ndaj spitalit”. Detaje të tjera mbi gjendjen e pacientëve apo numrin e të lënduarve ende nuk janë bërë publike.
Pamje që qarkullojnë në rrjetet sociale tregojnë momente paniku në ambientet e brendshme të spitalit, ku stafi dhe qytetarët shfaqen të tronditur mes pluhurit dhe rrënojave. Dëmet në infrastrukturë janë të dukshme dhe të konsiderueshme.
Zëdhënës të spitalit kanë konfirmuar se godina është prekur rëndë në disa zona, ndërsa theksojnë se vlerësimet për dëmet dhe personat e mundshëm të lënduar janë ende në proces. “U bëjmë thirrje qytetarëve të mos vijnë në spital për momentin,” thuhet në deklaratë.
