Ndërsa të gjithë po prisnim iPhone 8 duket se më shumë ka qenë një padurim për të parë pamjen e tij, sesa për ta blerë.
Në dyqanet “Apple” nuk ka radhë kilometrike dhe as njerëz që presin që prej orëve të para të mëngjesit, për të marrë në zotërim mrekullinë elektronike, që kushton jo pak, por 1000 dollarë, ndryshe nga vitet e shkuara. Më pak se 30 njerëz kanë pritur hapjen e dyqaneve në Sidenj të Australisë, ditën e prezantimit të telefonit. Nivel të ngjashëm mungese interesi, dëshmohej edhe në Azi dhe Europë.
Radha jashtë dyqanit të “Apple” në Londër ishte tejet modeste dhe vetëm dy adoleshentë pritën të merrnin të parët iPhone-n e ri në Glasgow të Skocisë.
Shkaku për këtë mungesë interesi besohet të jetë numri modest i ndryshimeve që iPhone 8 ka me 7, që i bën konsumatorët të kursejnë paratë e tyre për një artikull që nuk ka shumë ndryshim, me atë që tashmë zotërojnë. Në vitet e shkuara kur njerëzit rreshtoheshin me mijëra për të marrë një iPhone, mund të themi se pajisjet e reja ishin “avangardë” dhe kishin opsione që njerëzit nuk i kishin parë dhe përdorur më parë dhe aplikacione të reja.
Gjithashtu, shkak për këtë “kursim” mund të jetë edhe pritja për iPhone X që pritet të dalë në treg gjatë muajit nëntor që ndoshta ka shtyrë adhuruesit e iPhone të presin këtë model dhe të mos blejnë iPhone 8.
