Incidente dhe tensione ka patur mbrëmë në Tiranë, ku policia e Shtetit ka dalë me një thirrje për tifozët italianë dhe ata holandezë.
Raportohet se nga dhuna, ka patur disa të lënduar. Raportohet se njëri prej policëve të lënduar është plagosur me thikë.
Zv. drejtori i Përgjithshëm, Albert Dervishaj bën me dije se nëpër spitale janë paraqitur edhe persona të tjerë të cilët janë lënduar, ku mes tyre ka shqiptarë, italianë dhe holandezë.
“Si pasojë e dhunës së ushtruar nga tifozët e të dy skuadrave finaliste, janë plagosur 19 punonjës të Policisë së Shtetit në krye të detyrës, njëri prej të cilëve është plagosur me armë të ftohtë (thikë), të cilëve u është dhënë ndihma e menjëhershme mjekësore, si dhe janë dëmtuar edhe katër automjete shërbimi të Policisë së Shtetit. Përsa më sipër, në qendrat spitalore, gjatës natës së shkuar janë drejtuar për ndihmë mjekësore 10 shtetas, nga të cilët 5 shtetas shqiptarë, 3 italianë dhe 2 holandezë, të cilët pasi kanë marrë ndihmën mjekësore janë larguar”, thuhet në njoftim.
Ndërkohë, Dervishaj thekson se janë shoqëruar në komisariat tashmë 48 italianë dhe 12 shtetas holandezë.
Ata kanë patur leva dhe dorëze hekuri me vete.
Nga ana tjetër, janë dëbuar 80 tifozë italianë huliganë.
“Policia vlerëson sjelljen e qytetarëve të Tiranës. Vlerëson maksimalisht edhe qasjen sot, ku qytetarët shqiptarë kanë vlerësuar maksimalisht thirrjen e autoriteteve për të minimizuar lëvizjet dhe për të mos përdorur automjetet. Apelojmë bizneset që të mos tregtojnë pijet alkoolike në shishe dhe gota qelqi. Thirrje për tifozët italianë dhe ata holandezë që të sillen dhe të veprojnë si evropianë, të zbatojnë ligjet shqiptare. Ligji do të zbatohet me rigorizitet. Neni 235 parashikon dënim deri në 5 vite burg. Është vepër penale dhe kur kruhet në bashkëpunim dhe duke ushtruar dhunë dënohet deri në 7 vite. Edhe mosbindja ndaj urdhrit të policit dënohet me gjobë deri në burgim…Gjithashtu apelojmë për bizneset në Tiranë, që të mos tregtojnë pije alkoolike në shishe dhe gota qelqi, pasi përbëjnë rrezik të shtuar për shëndetin dhe jetën e qytetarëve në rast përfshirje të konflikteve fizike. Nëpërmjet kësaj daljeje publike apelojmë dhe adresojmë një thirrje për tifozët italianë dhe holandezë, të cilëve do t’ua komunikojmë edhe nëpërmjet kanaleve zyrtare, që të sillen dhe veprojnë si qytetarë evropianë, në qytet dhe në stadium, të zbatojnë ligjet e shtetit shqiptar dhe të mos konfrontohen me punonjësit e Policisë, përndryshe ligji do të zbatohet me rigorozitet”, theksoi Dervishaj.
