Një ngjarje e rëndë është regjistruar në Qafë Mollë, pranë vendit ku u gjet i vdekur biznesmeni dibran, Rruzhdi Hoxha.
Një efektiv policie ka shtyrë gazetaren e njohur kronikës së zezë Anila Hoxha dhe operatorin e saj.
Shërbimi për Çështjet e Brendshme dhe Ankesat (SHÇBA) ka nisur një inspektim ndaj punonjësit të policisë që shtyu operatorin e A2 CNN, Endrit Aga, dhe gazetaren e Top Channel, Anila Hoxha, të cilët rrezikuan të përfundojnë në greminë, ndërsa po mbulonin operacionin e Policisë në Dajt, për nxjerrjen e trupit të biznesmenit të vrarë Ruzhdi Hoxha.
“Në vijim të lajmit të publikuar në disa media, në lidhje me sjelljen jo korrekte të disa punonjësve të policisë me përfaqësues të mediave, e në veçanti me gazetaren Anila Hoxha gjatë raportimit të një ngjarjeje kriminale, SHÇBA njofton se ka nisur një inspektim për zbardhjen e plotë të rrethanave, si dhe vënien përpara përgjegjësisë të punonjësve të Policisë së Shtetit që kanë shfaqur sjellje jo etike e konform detyrës”, lexohet në njoftimin e SHÇBA-së.
Kujtojme se biznesmenin e kanë qëlluar me armë zjarri dhe më pas trupin e tij e kanë hedhur nga një shkëmb.
Policia e Tiranës ka ushtruar kontrolle me qen në zonën e Dajtit dhe nga kërkimet fillimisht u gjet xhupi dhe më pas trupi i pajetë.
Trupi i viktimës është gjetur i mbuluar me zhavor dhe po transportohet në morgun e spitalit për kryerjen e ekspertizës mjeko-ligjore për të përcaktuar shkakun e humbjes së jetës.
Sakaq, dyshohet se autori i ngjarjes është Fredi Rrushi, i arrestuar disa ditë më parë, i cili ka qenë personi që ka kontaktuar i fundit me biznesmenin. Rrushi është shpallur në kërkim edhe nga autoritetet italiane për veprën penale të trafikimit të narkotikëve.
Ruzhdi Hoxha rezultonte i zhdukur që prej 24 tetorit. Ishte djali i tij ai që referoi rastin në komisariatin numër 5 dhe më pas denoncimi kaloi në Policinë e Tiranës.
