Gazetari i njohur, Mustafa Nano në emisionin e tij “Provokacija” që shfaqet çdo të martë mbrëma në “ABC News”, kësaj radhe ka pasur në qendër Bora Zemanin dhe Ilda Bejlerin.
Emisioni i tij realizohet si një monolog ku ai rrëfen përjetimet dhe mendimet e veta rreth fenomeneve të ndryshme. Nano mbrëmjen e djeshme ka provokuar në mënyrë të hapur dy gazetaret sportive, të cilat janë komentuar negativisht për veshjen e tyre gjatë emisioneve që drejtojnë.
Në ekran ai shfaqi një foto të Bora Zemanit, e cila drejton emisionin “Bar Skendina” në Supersport, dhe u shpreh se veshja e saj është e papërshtatshme sepse shumicën e pjesëve të trupit i ka jashtë.
“Vajza që po shihni në ekranin e studios quhet Bora Zemani dhe është moderatore e një programi televiziv sportiv në SuperSport. Dhe që është program sportiv kuptohet sepse kemi dhe Dritan Shakohoxhën në fotografi. Prapa shpinës së Bora Zemanit është një ndenjëse, është ndenjësja e moderatores dhe unë jam i sigurt që momentin që Bora Zemani do të tentojë të ulet në ndenjësen e vet, sytë e të ftuarve në studio, sytë e panelistëve që janë ftuar aty për të komentuar eventin futbollistik të radhës, do të përqendrohen te zona ku fundi i fustanit të shkurtër të Borës takohet me këmbët e gjata të bukura, të drejta, të cilat me siguri do të kryqëzohen në stilin e Sharon Stone në filmin “Basic Instinct”, tha gazetari duke i befasuar të gjithë me komentin e tij.
Gjithashtu Mustafa Nano komentoi edhe mënyrën e veshjes së gazetares Ilda Bejleri, e cila drejton emisionin “Zona Gol”.
“Të shtunën e shkuar në mbrëmje, unë po shihja ndeshjen Napoli-Roma, e cila përfundoi 2 me 4. Por rezultati i ndeshjes nuk ka asnjë rëndësi në arsyetimin që unë po bëj. Dhe pas ndeshjes ishte programi “Zona Gol”. Është një program që drejtohet nga një vajzë tjetër, quhet Ilda Bejleri, e cila atë mbrëmje ishte veshur në mënyrën më të gabuar të mundshme. Unë nuk kam asnjë pamje të Ilda Bejlerit atë mbrëmje për t’jua treguar tani, sepse SuperSporti mesa duket nuk e ka bërë zakon që t’i hedhë në web, në Youtube, programet e veta televizive. Por unë po ju them se veshja e Ilda Bejlerit ishte e trishtueshme, ishte vulgare, ishte e pashijshme. Gati-gati ishte fyese. Një fustan si këmishë nate shumë i shkurtër, shumë i ngjitur pas trupit, tmerrësisht i ngjitur pas trupit. Aq sa unë po mendoja se ajo copa e fustanit ishte e futur në mish, gjinjtë që kishin kërcyer përpara në mënyrë të panatyrshme, aq sa unë po mendoja që ato gjinj ishin duke shpuar ekranin dhe do binin në shtëpinë time, në dhomën e ndenjes…”, u shpreh ai për Ildën.
Nano u shpreh se ai e vlerësonte një femër nudo, por ajo duhet të dijë ku ta shfaqë nuditetin e saj dhe jo në një emision të tillë televiziv.
“Një moderatore televizive, sipas meje, nuk duhet të vishet në këtë mënyrë. Dhe këtë po ua thotë një burrë që nuk e ka problem fare një vajzë gjysmë të zhveshur, që nuk e ka problem fare nuditetin femëror. Përkundrazi, gjëja më e bukur që unë kam parë në jetën time është një nudo femërore. Duhet të jenë të shumtë në këtë botë burrat si unë. Ne duam që ta shijojmë një nudo femërore në rrethana të tjera. Ne duam ta shijojmë një nudo femërore në fotografitë e bëra nga Helmut Njuton. Por jo në një studio televizive ku flitet për futboll, sepse një studio televizive është një studio televizive. Nuk është një lokal ku bëhet striptizë! Ky ishte monologu që unë kisha përgatitur për sonte”- përfundoi monologun e tij gazetari Mustafa Nano.
