Rozmari Jorganxhi, dirigjentja e parë shqiptare, është ndarë nga jeta ditën e sotme në moshën 83-vjeçare. Është mësuar se ajo ka ndërruar jetë në Trieste të Italisë dhe lajmin e trishtë e ka konfirmuar djali i saj, kantautori Gjergj Leka.
Ky i fundit ka publikuar në rrjete sociale një foto të së ëmës shoqëruar me një shkrim prekës.
“Më ike e nuk të dhashë puthjen e fundit… Mezi po prisje të bashkoheshe me babin dhe pikërisht sot në ditëlindjen e tij u ngjite lart. Mi bëj hallall të gjitha fajet”, ka shkruar Gjergj Leka.
Rozmari Jorganxhi nisi karrierën e saj që në vitin 1959 si soliste lirike. Ajo ka qenë mezzosoprano në Teatrin e Operas dhe Baletit dhe ka interpretuar me profesionalizëm në nivele të larta role nga operat ndërkombëtare.
Nga viti 1967-1984 ajo ka dirigjuar Korin e TOB duke qenë femra e parë dirigjente e këtij institucioni unik të kulturës shqiptare. Më 1993 Jorganxhi në moshën 56-vjeçare fiton audicionin dhe fillon si këngëtare profesioniste në Teatrin Giusepe Verdi të Triestes ku këndoi për 10 vjet.
