Në puntatën e fundit të emisionit “Dua të të bëj të lumtur”, të moderuar nga Arbana Osmani, është vërejtur një shkelje dhe për këtë Autoriteti i Medias Audiovizive i ka tërhequr vëmendjen televizionit “Top Channel”.
Vendimi i AMA-s vjen pas reagimeve masiv në rrjetet sociale, por edhe nga reagimi i 36 organizatave, të cilat punojnë për mbrojtjen dhe promovimin e të drejtave të njeriut, si dhe për të drejtat e vajzave dhe grave.
AMA vendosi që të merrte në shqyrtim emisionin “Dua të të bëj të lumtur”, pasi mënyra e trajtimit të historisë së një gruaje të dhunuar nga bashkëshorti, u cilësua si rast abuzimi. Historia e Elidës dhe Arjanit nxiti një valë të re komentesh të cilat paragjykojnë gratë e dhunuara, duke justifikuar dhunën ndaj tyre.
“AMa vendosi sanksionin ‘Tërheqje vëmendje’ ndaj subjektit tuaj audioviziv. Në rast përsëritje të shkeljes do të fillojë procedimin sipas kërkesave të parashikuara ligjore”, thuhet në letrën dërgua televizionit kombëtar, firmosur nga kreu i AMA-s, Gentian Sala.
Vendimi duket se është marrë për historinë e transmetuar fundjavën e kaluar, më 12 janar.
“Mënyra e trajtimit të historisë personale të Znj. E. justifikon dhe legjitimon ushtrimin e dhunës me bazë gjinore, duke u bërë faktor në riviktimizimin e vajzave e grave të dhunuara. Trajtimi jo i drejtë i këtij rasti abuzimi ka nxitur një valë të re komentesh, të cilat paragjykojnë gratë e dhunuara, duke justifikuar dhunën ndaj tyre. Kjo qasje përforcon stereotipet gjinore ku gratë perceptohen si të nënrenditura, si pronë dhe ku dhuna tolerohet apo justifikohet dhe vjen si pasojë e një “faji” të viktimës. Zonja E. i kërkonte falje bashkëshortit në emision për faktin që e kishte denoncuar në polici pas dhunës së ushtruar prej tij dhe kjo jepej në televizion me nota romantizmi”, thuhet në raportimin e AMA-s.
