Banesa ku jetojnë prindërit e gazetares së “News 24”, Klodiana Lala, u sulmua mëngjesin e kësaj të enjte nga persona të paidentifikuar.
Këta të fundit qëlluan me breshëri plumbash banesën, në të cilën në momentin e ngjarjes ndodheshin dy vajzat e mitura dhe prindërit e gazetares.
Klodiana Lala vendosi që të reagonte publikisht përmes një statusi në “Facebook”, ku shkruan se dyshimet për arsyen e sulmit lidhen me profesionin e saj.
“Të dashur miq! Po ju flas në emrin tim dhe të familjarëve të mi. Jemi mirë, asnjëri prej nesh nuk është lënduar. Megjithatë, jemi të tronditur nga ngjarja. Duke i lënë institucionet të bëjnë punën e tyre, ju siguroj se unë dhe familjarët e mi, nuk kemi asnjë konflikt personal. Dyshoj se sulmi vjen si rezultat i punës time si gazetare. Këtë profesion e kam ushtruar me ndershmëri e profesionalizëm ndër vite, e do vazhdoj këtë detyrë me të njëjtin përkushtim, pavarësisht gjithckaje. Falënderim Ministrit të Brendshëm dhe Policisë së Shtetit që u angzhuan maksimalisht për zbardhjen e ngjarjes. Ju jam mirënjohës secilit prej jush që po më gjendet pranë në këto momente. ” shkruan gazetarja Lala.
