Në këtë botë sipërfaqësore në të cilën jetojmë, të përqendruar pas aplikacioneve, duket sikur paraqitja është gjithçka.
Edhe në qoftë se ju keni personalitetin më të bukur në botë, dikush mund të “godasë”, nëse nuk pëlqen pamjen tuaj. Është brutale!
Por për një çift indian, në vend të dashurisë me shikim të parë, ishte një rast i dashurisë me zërin e parë.
Lalita Ben Bansi dhe bashkëshorti i saj, Ravi Shankar Singh, u dashuruan pas zërit të njëri-tjetrit pasi ajo telefonoi një numër të gabuar.
Ai e telefonoi atë sërish dhe ata përfunduan duke folur në telefon çdo ditë.
Kjo histori është më e prekshme për Bansi-n, pasi ajo është një e mbijetuar e një sulmi me acid. Ajo u sulmua nga një i afërm në vitin 2012 dhe duhej të bënte 17 operacione.
Sulmi ndodhi kur ajo po vizitonte vendlindjen e saj Azamgarh në Uttar Pradesh për dasmën e kushëririt të saj, raporton “Hindu”. Vëllai dhe kushëriri i saj më i ri u përleshën dhe Bansi hyri për t’i ndarë, i goditi të dy dhe i kërkoi që të ndalonin së zëni.
Në atë kohë, asaj i ishte caktuar një martesë në pesë muaj. 15 ditë para se bëhej martesa, kushëriri i saj hodhi acid në fytyrën e saj si hakmarrje pse e goditi.
Çdo vit në Indi ka 1000 sulme me acid dhe shumë prej tyre nuk raportohen.
“Kush do të kishte menduar se pas një sulmi me acid dhe 17 operacionesh do të gjeja dashurinë. Por kjo ndodhi”, tha 26-vjeçarja Bansi.
Ajo tha se gjetja e dashurisë ishte një mrekulli.
“Bansi kishte telefonuar aksidentalisht numrin tim rreth 3 muaj më parë. E mora prapa pas 15 ditësh. Ne folëm dhe u dashurova me zërin e saj. Bisedat tona vazhduan në çdo ditë dhe i propozova”, tha Singh.
Ndonëse nuk e kishin takuar kurrë, Bansi i tha Singh se ajo i kishte shpëtuar një sulmi me acid, por kjo nuk kishte rëndësi për të.
“Unë i thashë se isha në dashuri me të dhe doja të martohesha. Shumë çifte bien në dashuri me fytyrën e partnerëve të tyre dhe në fund divorcohen. Me të, unë nuk jam i shqetësuar për fytyrën e saj. Ajo është një person i ëmbël. Uroj që Perëndia të na bekonte përjetë”, tha Singh.
Burimi: Independent
