Prej tetë vitesh, i ati i Beatrix Ramosaj është ndarë nga jeta. Llapashtica e Podujevës zë një vend të veçantë në zemrën e këngëtares jo vetëm sepse është vendi i origjinës, por edhe përse aty prehet i ati i saj.
Mbrëmjen e sotme, Beatrix shkruan e tronditur në profilin e saj në “Instagram” për ngjarjen e pazakontë që ka ndodhur në ‘Llapashticën e Poshtme’ në Podujevë. Ajo rrëfen se një person i paidentifikuar ka dëmtuar gurët e 82 varreve, përfshirë dhe atë të atit të saj. Këngëtarja i bën apel drejtësisë të dënojë personin përgjegjës.
“Po shkruaj e tronditur..
Ka 1 javë që ka ndodhur kjo tragjedi në fshatin tim, Llapashticë e poshtme dhe unë vetëm sot e mora vesh dhe jam e tmerruar për faktin që kjo ngjarje nuk ka marrë vëmendjen e duhur.
Ndërkohë që unë shkruaj personi përgjegjës për këte është i lirë.
Ky person ka dëmtuar gurët e 82 varreve përfshirë dhe atë të babait tim dhe familjarëve të mi.
Ju lutem autoriteteve në Kosovë të bëjnë të mundur zbardhjen e kësaj çështje dhe të vendosin drejtësi për personin përgjegjës, nuk bëhet fjalë vetëm për dëm material, por ajo çfarë më vret më shumë është dëmi emocional”,-shkruan këngëtarja.
