Vetëm 6 muaj pas ngjarjes së rëndë që ndodhi pranë Fakultetit të Mjekësisë në Tiranë, përsëritet ditën e sotme historia e Ariela Muratit nga Aldison Belulaj.
Mëngjesin e sotëm në zonën e “Don Boskos” në Tiranë, një 31-vjeçar ka vrarë me pistoletë një vajzë 19-vjeçare dhe më pas ka qëlluar veten. Viktima është 19-vjeçarja Xhuljeta Çuni, nga Vinjolli i Kurbinit, ndërsa i riu që qëlloi ndaj saj dhe më pas veten është Xhaferr Mata, 31 vjeç, nga Kalimashi. Të dy jetonin në Tiranë.
Mësohet se vajza e re ka vdekur në vend, ndërsa djali ndodhet në spital në gjendje të rëndë shëndetësore. Raportimet e mediave nga vendi i ngjarjes flasin për një krim pasioni. Xhuljeta është qëlluar nga ish-i dashuri i saj Xhaferr pak metra larg kishës së “Don Boskos”.
31-vjeçari i është afruar vajzës teksa ecte në zonën e “Don Boskos”, mes tyre ka pasur një debat të shkurtër dhe më pas Mata ka qëlluar me pistoletë.
“Balkanweb” raporton se në gjendje të rënduar psikologjike ai ka shpërthyer në lot, ka kaluar në anën tjetër të rrugës dhe ka qëlluar veten.
Mësohet se 19-vjeçarja ka qenë e shoqëruar nga një tjetër vajzë. Mes dy të rinjve dyshohet se ka pasur një lidhje intime që më pas është ndërprerë nga e reja, çka ka sjellë dhe irritimin e 31-vjeçarit.
Kujtojmë se kanë kaluar vetëm 6 muaj nga një krimi i ngjashëm në kryeqytet, kur Aldison Belulaj, 23 vjeç, vrau pranë QSUT-së Arjela Muratin dhe më pas qëlloi veten. Pak kohë pas qëndrimit në koma, Belulaj ndërroi jetë.
