Përshëndetje! Kam një kolege të punës, të cilën e kam ndihmuar shumë për çdo gjë. Kur i vdiq e ëma unë i kam ndenjur afër shumë, kam fjetur me të, mos ta lija vetëm dhe me nxënësit për mësim dhe në fund më tha që m’i ke prish nxënësit dhe ka folur fjalët më të ndyra për mua deri tek gjërat më intime, se më kanë thënë koleget. Një shoqja ime e ndarë nga burri ka folur shumë keq për këtë kolegen time dhe sa më ka parë me këtë shoqen ka ndryshuar qëndrim, filloi mos të fliste shumë. Por për mua s’do të thotë pse isha me të, duhet të jem si kjo shoqja ime, sepse më njeh shumë mirë. Një këshillë do të më ndihmonte se çfarë të bëj në këtë rast, se nuk flas me këtë kolegen time. Nuk di çfarë të bëj, më ka shqetësuar jashtë mase.
Përshëndetje e dashur lexuese! Duhet të jetë shumë e vështirë dhe zhgënjyese kur ndihmon e mbështet dikë dhe në këmbim, merr fyerje dhe sharje. Nga letra juaj, shoh se ia keni dhënë këtë ndihmë një personi që është kolegia juaj e punës. Ju i qëndruat shumë afër dhe e mbështetët kolegen në një moment të vështirë. Dhënia e një mbështetjeje kaq të madhe tregon se ju jeni një person bujar dhe dashamirës. Mirëpo, jo gjithmonë ndodh të na kthehet ajo që kemi dhënë. Madje, mund të ndodhë krejtësisht e kundërta.
Shpesh ne duam të miqësohemi me kolegët e punës, sepse kalojmë një pjesë të madhe të kohës me ta. Përveç kësaj, miqësitë dhe marrëdhëniet në punë, na ndihmojmë që të përballojmë situatat e përditshme, sidomos ato më të vështirat. Edhe studimet kanë treguar se marrëdhëniet pozitive në punë na bëjnë më të lumtur, në përgjithësi. Mirëpo, nga ana tjetër, të bësh mike një kolege pune, mund të ketë efekte negative. Si këto që ju përshkruani në letrën tuaj. Prandaj, kur krijon shoqëri me kolege në punë, duhet që disa gjëra të mbahen sekrete, si për shembull, gjendja juaj financiare, lidhjet tuaja, problemet shëndetësore dhe çështje të tjera personale. Pse? Sepse mund të vijë një ditë që këto gjëra intime, të bëhen publike dhe ju të lëndoheni.
Çfarë mund të rishikoni te marrëdhëniet me njerëzit dhe në veçanti, me koleget?
Një nga gjërat që duhet mbajtur parasysh është kujdesi kur zgjidhni njerëzit që përfshini në rrethin tuaj shoqëror. Personat që i konsiderojmë “shokë” ose “shoqe” nuk duhet të na gjykojnë ose të na lëndojnë, duhet të na respektojnë, të jenë besnikë dhe të na dëgjojnë. A i ka treguar ndonjëherë këto cilësi kolegia juaj? A e njihnit mirë atë, përpara se t’ia ofronit ndihmën?
Së dyti, ju duhet të ruani kufijtë me njerëzit, sidomos me koleget e punës. Ndërveprimi shoqëror me kolegët duhet të jetë i kufizuar. Në punë shkojmë për qëllime të tjera, jo për të krijuar miqësi. Mirë është që ndërveprimet të kufizohen brenda orarit të punës dhe jo jashtë saj. Duke bërë shumë shoqe një kolege, kjo e dëmton ekuilibrin mes jetës personale dhe asaj profesionale.
Ka dallime mes një kolegeje dhe një shoqeje dhe këto dallime duhet të mbeten ashtu siç janë. E keni pyetur veten: Nëse ju do të ndodheshit në të njëjtën gjendje, a do të merrnit të njëjtën ndihmë nga ajo? A e njihni mjaftueshëm atë dhe jetën e saj? A keni gjëra të tjera të përbashkëta përveç punës suaj?
Së fundmi, mendoni për nevojat tuaja të brendshme. Për çfarë keni vërtet nevojë nga njerëzit? A ndiheni më e sigurt nëse keni miqësi të forta në punë? Pse? Kështu, do të mund të qartësoni rolin tuaj (në jetë dhe në punë) atë që prisni nga vetja dhe nga të tjerët dhe kësisoj, mund të ndiheni më e qetë.
Si të përballeni me të?
Të përballesh me fyerjet nuk është e lehtë. Sidomos kur ato bëhen nga persona që i kemi kolegë në punë. Mënyra më e mirë për t’i përballur është të ruani qetësinë, të vlerësoni situatën dhe të zgjidhni një mënyrë të përshtatshme reagimi. Nëse nuk i përballoni dot në heshtje fyerjet apo të mos u kushtoni rëndësi atyre, ju duhet të përballeni drejtpërdrejt me kolegen tuaj. Takohuni, bisedoni vetëm për vetëm me të dhe thuajini sesi jeni ndjerë kur dëgjuat gjërat që ajo kishte thënë për ju. Mënyra sesi ju do të reagoni do të ketë efekt, prandaj përballuni me të pa agresivitet. Thjesht kërkoni informacion prej saj: pse ka vepruar kështu? Thuajini se kjo sjellje është e papranueshme dhe kërkojini që të mos e bëjë më. Nuk është e thënë të kërkojë falje, e rëndësishme është që ju t’ia thoni si jeni ndjerë dhe që nuk do të toleroni më fyerje. Po ashtu, mund të kërkoni mbështetje nga mikeshat tuaja dhe njerëzit që ju rrethojnë, sepse ata mund t’ju vijnë në ndihmë për ta peshuar më mirë situatën.
Ju përshëndes!
*Lediona Braho, psikologe klinike
Për Iconstyle.al
