Në pallatin 18 në qytetin e Durrësit, fatkeqësisht familja Reçi dhe tre anëtaret e familjes Karanxhaj, nuk mundën të mbijetonin pas tërmetit shkatërrues.
Në këtë pallat ndodheshin shumë banorë, megjithatë për fat të mirë disa prej tyre ia kanë dalë të mbijetojnë.
Një ndër të mbijetuarat që banonte në këtë pallat, Violeta Doda, ka rrëfyer për ‘Report.tv’ tmerrin e përjetuar gjatë atij mëngjesi dhe se si ajo bashkë me fëmijët e saj, kanë arritur të dalin shëndoshë e mirë nga ndërtesa.
Violeta, 53-vjeçarja me profesion mësuese, ka treguar se ka arritur të dilte së bashku me dy fëmijët e saj dhe të emën nga një vrimë e mbetur e hapur në dhomën e tyre të gjumit. ‘Zoti na bashkoi të katërve bashkë, kam nxjerrë fëmijën e vogël 10 vjec para, më pas djalin e madh (14 vjec), vetë kam qëndruar duke nxjerrur mamanë dhe më kanë ndihmuar për ta nxjerrur. Gjendja ka qenë shumë e rëndë. Kemi dalur dukë kërkuar ndihmë, na ka ndihmuar dhe dikush nga një pallat tjetër që nuk e njihja, pastaj më kanë marrë shoqet dhe më kanë dërguar në shtëpitë e tyre.
Ajo ka treguar se ndërkohë që po dilte ka dëgjuar zërin e vogëlushës Eisela (8 vjeçe) të bijën e Diene Karanxhaj, teksa thërriste për ndihmë.
