2021-shi nisi me një lajm të hidhur, ndarjen nga jeta të aktorit dhe regjisorit të shquar shqiptar, Dhimitër Orgocka. Artisti ndërroi jetë pas një hemorragjie celebrale dhe shuarja e tij erdhi si një lajm shumë i papritur për të gjithë miqtë e të afërmit.
Ditën e sotme Orgockës i është dhënë lamtumira e fundit dhe janë organizuar homazhe në teatrin e Korçës “Andon Zako Çajupi”. Duke respektuar rregullat anti-Covid, regjisori është përcjellë sot edhe për në banesën e fundit. Miq të tij janë shprehur se kjo është një nga ngjarjet më të rënda për qytetin e Korçës dhe jo vetëm këtë fillim viti e nuk kanë mundur të mbajnë as lotët teksa kanë folur për Dhimitër Orgockën.
“Është një ditë shumë e dhimbshme për Korçën, pasi kemi humbur një nga emblemat më të mëdha të artit. Kemi dhimbje të gjithë, e gjithë Shqipëria. Ai është heroi i të gjitha veprave që ka vënë në skenë. Është shumë e vështirë ti japim lamtumirën këtij njeriu që para një jave ishte shumë mirë. E përshëndetëm, i uruam Vitin e Ri dhe na erdhi shumë e papritur ndarja nga jeta e këtij artisti të madh. E donte dhe e mbështeste shumë dramaturgjinë shqiptare. Ne e kemi si amanet dhe do ta çojmë më tej. Do të jetë i përjetshëm kujtimi i tij. Teatri e ka një ikonë, do ta ketë një emblemë. Ai ka një vend të rëndësishëm në muzeun e teatrit, në zemrat e njerëzve. Lamtumirë i dashur koleg!”, u shpreh Zamira Kita mes lotësh.
“Nuk e besoj të ndodhte kjo që ndodhi. Unë se kam menduar kurrë se ai do të ikte para meje. Është me të vërtetë një ngjarje e jashtëzakonshme, skena korçare humbi një ikonë të vërtetë, që tërë jetën e tij e shkriu për skenën korçare. Më ka lënë mbresa të jashtëzakonshme me përkushtimin e tij për skenën. E kam pasur shok, e kam pasur koleg, e kam pasur regjisor, kemi pasur të njëjtat mendime për artin dhe skenën”, tha aktori Koço Qëndro.
Dhimitër Orgocka ka dhënë një kontribut tepër të çmuar në kinematografinë e teatrin shqiptar dhe gjatë karrierës artistike është nderuar me disa çmime, ndër to edhe “Mjeshtër i Madh”.
