Të gjithë e mbajmë mend Alesio Cakonin, heroin e vogël të tërmetit të 26 nëntorit, i cili i shpëtoi një tragjedie duke u hedhur nga ballkoni i banesës së tij në katin e 5, por humbi motrën e tij dhe të atin.
Asokohe, “iconstyle.al” u kujdes personalisht për djaloshin, të cilit i qëndroi pranë dhe e ndihmoi duke i ofruar një strehë ku të qëndronte pas daljes nga spitali, ndihmë mjekësore, veshje dhe lodra për t’i hequr sado pak mendjen nga humbja e madhe.
Alesio rrugës për te parku i lojërave shoqëruar nga stafi i “iconstyle.al”
Madje djaloshit i mundësuam edhe një bisedë me reperin Stresi, i cili është idhulli i 11-vjeçarit.
Historia e vogëlusht u bë e bujshme në media dhe kryeministri Rama i siguroi Alesios një takim me dy futbollistët e preferuar, Cristiano Ronaldo-n dhe Gianluigi Buffon, të cilët jo vetëm që e takuan Alesion por edhe i dhuruan bluzat e klubit të tyre së bashku me një autograf.
Por sot, 10 muaj pas tragjedisë së tërmetit, nëna e Alesios, Manjola Cakoni ndihet e harruar nga shteti, i cili e ka lënë edhe pa pension dhe shprehet se “nuk mund të jetohet me fotot e Ronaldos”.
Familja Cakoni u vendos në Bathore, në një shtëpi ku vetë kryeministri Edi Rama shkoi për t’i vizituar në fillim. Sipas Manjolës kanë qenë vetë njerëz të stafit të Kryeministrit që e kanë marrë në telefon, e i kanë premtuar një pension. Por pas disa kohësh i thanë se nuk e përfitonte pensionin, të cilin mund ta merrte po të kishte 3 viktima në familje.
Është e hidhur të dëgjosh që edhe faturën prej 3.5 milionë lekësh të shërbimeve funerale, dhe të drekës mortore, që e mori përsipër ta paguante shteti shqiptar, e paguan të afërmit e familjes dhe Manjolës nuk i është dhënë akoma.
Alesio merr sot një bonus prej 150 mijë lekësh në muaj, ose 5 mijë lekë në ditë, ndërsa pensioni i burrit që humbi jetën është 40 mijë lekë në muaj. Kjo familje duhet të mbahet me 1 300 lekë në ditë.
Në një intervistë për News 24, Manjola Cakoni thotë se bashkëshorti dhe vajza, ikën nga kjo jetë prej neglizhencës së shtetit, sepse tërmeti i shtatorit shkaktoi dëmtime të mëdha në pallatin e tyre, por ekspertët nuk dolën në një përfundim, dhe nuk iu thanë as të hyjnë as të dalin nga shtëpia.
40-vjecarja dhe Alesio paralajmërojnë se këtë çështje do ta ndjekin edhe në rrugë gjyqësore, sepse janë të bindur se kjo histori ka përgjegjës.
Manjola Cakoni ka një mesazh të drejtpërdrejtë për Kryeministrin Edi Rama dhe kërkon nga shteti shqiptar lidhjen e një pensioni që do të bënte të mundur të përballonte jetën e tyre, në një kohë kur djali është 11 vjeç dhe nëna e pamundur për të punuar, për shkak të problemeve shëndetësore që ka.
/Iconstyle.al
