Një djalosh 4-vjeçar shqiptar ka gjetur vdekjen tragjike në Londër. Lindita dhe Kastriot Klosi e dërguan djalin e tyre, Danielin, në Spitalin Royal Free në Camden, katër herë para se të gjente vdekjen por mjekët e linin të shkonte duke i thënë se s’kishte gjë dhe çifti pretendon se mjekët i këshilluan t’i jepnin djalit të tyre Calpol dhe Ibuprofen.
Në vizitën e katërt Danieli, i cili kishte autizëm, u shtrua në urgjencën e fëmijëve me ‘sepsis’ dhe vdiq disa orë më vonë. Mami Lindita, një asistente farmacie dhe mjeke e kualifikuar në vendlindjen e saj, Shqipëri, tha për mediat angleze: “Daniel ishte djalë i adhurueshëm dhe ishim shumë të bekuar që ai ishte djali ynë. Ai adhuronte të gatuante me mua. Ai adhuronte kafshët, të dëgjonte histori dhe të luante me shokët e tij. Daniel ishte shumë kurioz dhe i etur për të mësuar. Ai të kënaqte.
Ne ende po përpiqemi të kuptojmë çfarë ndodhi me Danielin dhe pse. E çuam vazhdimisht në spital dhe ishim shumë të shqetësuar për gjendjen e tij, por asgjë nuk të përgatit për lajmin se djali yt i vogël tashmë ka vdekur. Atë ditë familja jonë ndryshoi përgjithmonë. Ditët tona janë të mbushura me ankth, zbrazëti dhe pikëllim.”
Çifti ka kërkuar ndihmë nga avokatët specialistë të neglizhencës mjekësore në Irwin Mitchell dhe hetimi për vdekjen e Danielit do të fillojë më 13 gusht në Gjykatën e Kërkimit të Poplar.
Hetimi pritet të zgjasë dy ditë dhe familja shpreson se do të japë disa përgjigje shumë të nevojshme.
