Papa Françesku ka shprehur publikisht mbështetjen e tij për bashkimet mes të njëjtit seks gjatë një interviste për dokumentarin me metrazh të gjatë “Francesco”, i cili u shfaq si premierë të mërkurën në Festivalin e Filmit në Romë. Madje Papa ka kërkuar që të përgatitet një ligj për bashkimin civil, që do i lejonte njerëzit e komunitetit LGBT, që të krijojnë familje.
“Homoseksualët kanë të drejtë për një familje. Ata janë bijë të Zotit. Nuk mund ta dëbosh dikë nga familja, as tua bësh jetën të mjerë për këtë gjë. Ajo që duhet të kemi është një ligj i bashkimit civil dhe në këtë mënyrë ata janë të mbuluar ligjërisht”, është shprehur Papa Françesku.
Gjatë historisë së saj Kisha Katolike nuk i ka pranuar homoseksualët dhe ende e shikon homoseksualitetin si një çrregullim të brendshëm. Sipas kishës tendecat homoseksuale nuk janë mëkatare, por aktet e tilla po. Madje paraardhësit e Papa Françeskut, përfshirë Benedict XVI dhe John Paul II, dënuan martesën e të njëjtit seks gjatë mandatit të tyre papnor.
Vetë Papa Françesku kundërshtoi legjislacionin për të miratuar martesat e të njëjtit seks kur ishte kryepeshkop në Buenos Aires një dekadë më parë, por mbështeti një lloj mbrojtje ligjore për të drejtat e çifteve homoseksuale në atë kohë.
Papa Françesku ka folur edhe më parë për këtë çështje dhe gjatë vitit 2013-të një deklaratë e tij kur u shpreh se ai nuk është askushi për të gjykuar një homoseksual tërhoqi vëmendjen e të gjithëve. Gjithashtu ai ka folur shpesh për shërbesën e tij ndaj katolikëve gay dhe lezbike, duke thënë se ata janë të dashur nga Zoti dhe të mirëpritur nga kisha.
