Kompozitori i njohur shqiptar, Avni Mula, është ndarë ditën e djeshme nga jeta në moshën 92-vjeçare.
Këtë lajm të hidhur e dha vajza e tij, sopranoja e njohur Inva Mula, e cila shkroi në Facebook:
“Gjigandi jonë fluturoi në Valsin e Perjetësisë! Për një përshendetje me dorë në zemër, homazhet kryen nesër, 30 tetor, ora 11:00-13:00 në hollin e Universitetit të Arteve, Tiranë. Avni Mula 04.01.1928 – 29.10.2020.”
Ndër të parat figura publike që shprehu gushëllimet për sopranon dhe familjarët në rrjete sociale ishte moderatori i njohur Ardit Gjebrea.
2Tashmë u bashkuan në qiell!
Dhe unë kthehem në fëmijëri, kur muzika e Tij më dha emocionet e para:
“Kur këndoj për ty moj nënë”
“I ëmbël zëri i gjyshes”
“Për çdo vit në maj”
Sa shumë kujtime Avni Mula – paqe për Ty!
Ngushëllime @invamula”
Siç ishte lajmëruar, sot janë mbajtur homazhe në hollin e Universitetit të Arteve për kolosin e muzikës shqiptare.
Emra të njohur të të gjitha fushave ishin të pranishëm në lamtumirën e fundit për Avni Mulën, ndërsa vajza e tij Inva ka folur shkurt e përlotur dhe me zërin që i dridhej:
““Këtu filloi arti i lirisë. Rroftë arti, rroftë Avni Mula, rroftë arti shqiptar”, u shpreh ajo.
Pjesë e homazheve ishte Ministrja e Kulturës, Elva Margariti e cila shprehu ngushëllimet për ndarjen nga jeta të kolosit të muzikës shqiptare, si dhe shtoi se është e trishtuar që në këtë periudhë artistët nuk po mund të përcillen në banesën e fundit siç meritojnë.
“Kjo periudhë nuk e di nëse është pandemie që na ka bërë më sensibël dhe i është shtuar dozës së trishtimit, si në aktivitet dhe mos pasja e mundësisë që ta përcillnim ashtu siç do kishim dëshirë. Jam besim që vepra që kanë lënë pas është një vepër që u flet të gjithë brezave, por edhe tek të rinj. Homazhet te Universiteti i Arteve është një simbolikë që flet dhe dialogon edhe më mirë dhe për të zgjuar ndërgjegjësimin e tyre që nuk e i kemi fizikisht, janë për ne nder i kombit, jo thjesht fjalë që duhet thënë, por një realitet që edhe të rinjtë do e përcjellin gjithnjë e më tepër në veprat e tyre”, tha Margariti.
I pranishëm në homazhe ishte gjithashtu
kryedemokrati Lulzim Basha, i cili tha se është një dhimbje e madhe, por edhe një ditë krenarie që kombi ynë pati në gjirin e tij një artist si Avni Mula.
“Një dhimbje e madhe, por është një ditë krenarie që kombi ynë pati në gjirin e saj një artist si Anvi Mula dhe kjo është ndër të paktat raste kur ceremonia shoqërohet me muzikë, artin e tij dhe t’i lutemi Zotit që t’i prehet shpirti në paqe”, tha Basha.
Kompozitori Robert Radoja ka treguar se e ka të vështirë t’i gjejë fjalët për ndarjen nga jeta të Avni Mulës. Mes lotësh, ai vë theksin se në jetën e tij Mula ka luajtur një rol shumë të rëndësishëm.
“Shumë e vështirë për të gjetur fjalën e duhur sepse e kam pasur mësues, prind, shok, koleg, këshilltar dhe ndihmë gjithë jetën time, është shumë e vështirë të flasësh, të gjesh fjalën e duhur”, tha Radoja.
Baritoni dhe kompozitori i njohur Avni Mula, është vlerësuar dhe nderuar për krijimtarinë që ka sjellë jo vetëm në skenën operistike, por dhe në atë të këngës në festivale të ndryshme.
