Parlamenti holandez vendosi për pezullimin e përkohshëm të liberalizimit të vizave për shqiptarët dhe rikthimin e vizave për ta. Ndërkohë që kjo kërkesë do të shqyrtohet nga BE, Ministria e Jashtme informoi shtetasit shqiptarë se kjo gjë nuk ndryshon rregullat e lëvizjes drejt vendeve shengen.
“Shtetasit shqiptarë do të vazhdojnë të lëvizin të lirë drejt vendeve shengen sipas praktikës të derisotme dhe duke plotësuar vetem kushtet aktualisht në fuqi. Një shtet anëtar i BE mund t’i kërkojë Komisionit Evropian hapjen e procedurës së pezullimit të lëvizjes pa viza vetëm mbi bazën e kushteve të mirëpërcaktuara në legjislacionin e BE dhe asnjë kusht nuk plotësohet për paraqitjen e kësaj kërkese nga Holanda për Shqipërinë”, thuhet në njoftimin e ministrisë.
Gjithsesi është Komisioni Evropian që do të shqyrtojë kërkesën dhe do t’i japë përgjigje asaj. Migracioni i paligjshëm i shtetasve shqiptarë drejt Holandes ka rënë vazhdimisht, ndërkohë që pezullimi aplikohet në rast rritje mbi 50%.
“Shifrat e krimit shënojnë gjithashtu ulje përmbajtësore. Po ashtu, edhe kriteri i fundit që ka të bëjë me bashkëpunimin mes strukturave ligjzbatuese të dy vendeve janë cilësuar të shkëlqyera qoftë nga zyrtarët shqiptarë, qoftë nga ata holandezë. Qeveria e Republikës së Shqipërisë është e angazhuar të vazhdojë në mënyrë intensive bashkëpunimin si me autoritetet e Mbretërisë së Vendeve të Ulta dhe me vëndet e tjera anëtare të BE për të luftuar aktivitet e paligjshme ndërkufitare”, vijon më tej njoftimi.
