Fotografia e reklamimit të një bluze po vë në rrezik reputacionin e markës së njohur të veshjeve H&M. E gjitha nisi pasi kompania publikoi një foto në të cilën paraqitej një fëmijë me ngjyrë që vishte një bluzë ku shkruhej: “Majmuni më i bukur i xhunglës”.
Disa nga emrat e njohur që bashkëpunonin me markën suedeze njoftuan nga dje shkëputjen e bashkëpunimit.
Në një deklaratë për mediat, H&M kërkoi falje publike duke sqaruar të gjithë situatën:
“Standardet tona janë të larta dhe ne mendojmë se kemi bërë progres gjatë viteve duke luajtur rolin tonë në promovimin e diversitetit dhe gjithëpërfshirjes. Por duket se nuk kemi shkuar shumë larg.
I kuptojmë të gjitha kritikat që kjo ka gjeneruar – kemi gabuar dhe e pranojmë, edhe pse është racizëm i paqëllimshëm apo rastësor duhet të çrrënjoset kudo që ekziston. E vlerësojmë mbështetjen e atyre që kanë parë që produkti dhe promovimi ynë nuk kishte për qëllim të ofendonte, por si një markë globale, ne kemi përgjegjësi të jemi të vetëdijshëm dhe të përshtatemi me të gjitha çështjet e ndjeshme racore dhe kulturore.
Ky incident është i rastësishëm, por kjo nuk do të thotë që nuk e marrim atë shumë seriozisht ose nuk e kuptojmë shqetësimin që ka shkaktuar.
Ne kemi hequr imazhin dhe bluzën në fjalë nga shitja. Ajo do të riciklohet.
Tani do të bëjmë gjithçka që mundemi për të parandaluar që kjo të ndodhë përsëri në të ardhmen.
Racizmi dhe paragjykimet në çdo formë, të vetëdijshme ose të pavetëdijshme, të qëllimshme apo aksidentale, janë thjesht të papranueshme dhe duhet të çrrënjosen nga shoqëria. Ju lutemi pranoni faljet tona të përulura”.
Tashmë në mediat sociale është publikuar një foto (jo nga H&M) e djalit që mban veshur të njëjtën bluzë, por ndryshon mesazhi i shkruar në të:
“Një ditë unë do të bëhem presidenti që mund t’i besosh”.
Burimi: H&M
